سەردێر

دوو لیوای پێشمەرگە لە پێدانی 3 مووچەكە بێبەش بوون

خەڵك-
دوو لیوای هێزەكانی پێشمەرگەی سەر بە لیوا یەكگرتووەكان لەلایەن ئەمریكاییەكانەوە بێبەش كران لە پێدانی 3 مووچەی قەرەبووی ساڵی ڕابردوو، بەڵام وەزارەتی پێشمەرگە هیچ لێدوانێك لەبارەیانەوە نادات.

بەپێی بەدواداچوونەكانی (خەڵك) لە ڕۆژی پێنج شەممەی ڕابردووەوە پێدانی مووچەی لیوا یەكگرتووەكانی پێشمەرگە لە پارەی هاوكار دارایی ئەمریكا دەستی پێكردووە و 3 مووچەی فەوتاوی ساڵی ڕابردوویان پێ‌ دراوە.

بۆ بەدواداچوونی ئەو پرسە (خەڵك) پەیوەندی كرد، بە فەریق جەبار یاوەر، ئەمینداری گشتی وەزارەتی پێشمەرگەوە، بەلام ئامادە نەبوو هیچ لێدوانێك بدات و وتی، “قسەی ئێمە تەنها ڕاگەیەنراوی فەرمی وەزارەتە، كە پێشتر بڵاوكراوەتەوە”.

سەرچاوەیەكی وەزارەتی پێشمەرگە بۆ (خەڵك) ئاماژەی بەوەكرد، لە پێدانی ئەو مووچە فەوتاوانە هەردوو لیوای (9 و 12) بێ بەش كراون و وەزارەتی پێشمەرگەش لەپەیوەندیدایە لەگەڵ ئەمریكاییەكان تاوەكو ئەوانیش بگرێتەوە.

هەر بە وتەی سەرچاوەكە، “ئەو دوو لیوایە تەنها مووچەی مانگی (شوبات و ئادار)یان بەبێ‌ لێبڕین وەرگرتووە و چاوەڕێ‌ دەكەین كێشەەكان چارەسەر ببن و ئەوانیش مووچە فەوتاوەكانیان وەك سەرجەم لیواكانی دیكە پێ‌ بدرێت”.

بەپێی بڕیاری هێزەكانی هاوپەیمانان بە سەرۆكایەتی ئەمریكاییەكان، لە هاوكارییە داراییەكانی ئەمریكا بڕیارە 7 مووچەی نەدراوی ساڵی ڕابردوو بدرێتەوە بە هێزەكانی پێشمەرگە لە لیوا یەكگرتووەكان.

لای خۆشیانەوە، هێزەكانی پیادە لە وەزارەتی پێشمەرگە لە پەیامێكدا بۆ وەزیری پێشمەرگە، كە وێنەی دەست (خەڵك) كەوتووە ئاماژەیان بەوەكردووە، “تكات لیدەكەین هەوڵی تەواوی خۆت بدە بەزووترین كات كێشەی برا پیشمەرگەكانمان لە لیوای ٩ چارەسەر بكەیت، چونكە ئەوان سوودمەند نەبون لە3 مووچەی بێ لێبڕین”.

ڕاشیانگەیاندووە، “لیوای ٩ بەشداری لەتەواوی شەڕی داعش كردوە لەقاتعی داقوق توانی سنوورەكە لەداعش بپارێزێت و چەندین شەهید و برینداریان هەیە”.