سەردێر

شارێكی عیراقی مۆڵەتی 72 كاتژمێر دەداتە حكومەت

خەڵك-
خۆپیشاندەرانی شاری ناسریە، سەنتەری پارێزگەی زیقار، مۆڵەتی 72 كاتژمێر دەدەنە حكومەتی ناوەند، تا پارێزگاریی نوێ‌ دەستنیشان بكات، هەڕەشەی گێڕانەوەی خێمەكانی مانگرتنیش دەكەن بۆ گۆڕەپانی حەبوبی.

بەپێی بەیاننامەیەك كە لەلایەن خۆپیشاندەرانی شاری ناسریەوە بڵاوكرایەوە”داوا لە حكومەتی خۆجێی و حكومەتی ناوەند دەكەین، پارێزگارێكی سەربەخۆ لە كاندیدەكانی گۆڕەپانەكانی خۆپیشاندان دەستنیشان بكات تا لە پۆستەكەدا دەستەبەكاربێت، و دانانی پارێزگار بەدوور بێت لە دەستوەردانی حزبی”.

هەر لە بەیاننامەكەدا خۆپیشاندەدەرانی ناسریە، هەڕەشەی گێڕانەوەی خێمەكان و دەستكردنەوە بە مانگرتن و خۆپیشاندانی ئاشتیانە دەكەن، لە حاڵەتی جێبەجێنەكردنی داواكارییەكانیان لەماوەی 72 كاتژمێر.

خۆپیشاندەران لە بەیاننامەكەدا دەڵێن”داواكارییەكانیان بریتین لە لابردنی ئەندامانی حكومەتی خۆجێی و بەڕێوەبەرەكانی فەرمانگەكان و سەرۆكی یەكە ئیدارییە گەندەڵەكان، و دابینكردنی پێداویستییەكانی ژیانێكی شكۆمەندانە بۆ دانیشتوانی پارێزگەی زیقار و لێپێچینەوە لەگەڵ ئەوانەی دەستییان لە ڕووداوەكانی ئەم دواییەدا هەبوو”.