سەردێر

پارێزگەیەكی عیراقی تەقەكردن بە ئاسماندا قەدەغە دەكات

خەڵك-
لە پارێزگەیەكی عیراق، تەقەكردن بە ئاسماندا قەدەغە دەكرێت و ڕێكاریی یاساییش دژ بە سەرپێچیكاران دەگیرێتەبەر.

بەپێی بەیاننامەیەك كە ئەمڕۆ پێنج شەممە لەلایەن نوسینگەی نەجم جبوری پارێزگاری نەینەوا بڵاوكرایەوە”تەقەكردن بە ئاسماندا بە هەموو شێوەیەك قەدەغەكرا”.

هەر لە بەیاننامەكەدا هاتووە”تەقەكردن بە ئاسماندا بەهەموو شێوەیەك قەدەغەكرا، ئیتر بە هەر هۆكارێك بێت، فەرمان بە لایەنە پەیوەندیدارەكانیش كراو، ڕێكاریی یاسایی دژ بە سەرپێچیكاران بگرنەبەر”.

شاری موسڵ سەنتەری پارێزگەی نەینەوا، لە مانگی حوزەیرانی ساڵی 2014 لەلایەن چەكدارانی ڕێكخراوی داعشەوە كۆنترۆڵكرا و پاش ماوەیەكی كەمیش زۆربەی ناوچەكانی پارێزگەكە كەوتنە ژێر دەستی ڕێكخراوە.

لە 10ی تەمموزی ساڵی 2017، حەیدەر عەبادی سەرۆك وەزیرانی پێشووتری عیراق، ڕزگتاركردنی شارەكەی لە چنگی داعش ڕاگەیاند.