سەردێر

پۆلیسی هەولێر: دوو دز دەستگیركران

خەڵك-
پۆلیسی هەولێر دەستگیركردنی دوو تۆمەتبار ڕادەگەیەنێت كە ” هەڵسابوون بە ئەنجامانی چوار تاوانی دزیكردن”.

بەپێی ڕاگەیەندراوێك كە لەلایەن پۆلیسی هەولێر بەشی پۆلیسی نەهێشتنی تاوان، نووسینگەی بەحركەوە بڵاوكرایەوە”لە دوو هەڵمەتی جیادا لە سنووری ناحیەی بەحركە، توانییان دوو تۆمەتبار دەستگیر بكەن، كە هەڵسابوون بە ئەنجامانی چوار تاوانی دزیكردن”.

هەر لە ڕاگەیەندراوەكەدا هاتووە”تۆمەتباری یەكەمیان هەڵسابوو بە دزیكردن لە شاری (ئەتكوانس) لە كۆمپانیایەك و لە ماڵێكدا، كە لە ماڵەكە بایی (11 هەزار) دۆلاری ئەمەریكی زێڕی دزیبوو، لە كۆمپانیاكەش لاپتۆپێك و ئایپادێك و هەروەها سەعاتێكی دەستی جۆری (رۆلێكس)ی دزیبوو، كە بایی (15 هەزار) دۆلار بوو”.

پۆلیسی هەولێر دەڵێت”تۆمەتباری دووەمیش هەڵسابوو بە دزیكردن لە دوو ماڵ لە (هەرشەم 3) كە لە ماڵێكیان بڕی (5 ملیۆن و 500 هەزار) دیناری عێراقی و هەروەها لە ماڵێكی تریش (70 مسقاڵ) زێڕ و چەندین ئامێری ئەلیكترۆنی دزیبوو، لە ئێستاشدا هەردوو تۆمەتبار بەپێی ماددە (443) و (444) لە یاسای سزادان، بەند كراون”.