سەردێر

زانكۆیەكی سلێمانی چەند بڕیارێكی بۆ دەوام دەركرد

خەڵك-
ئەنجوومەنی زانكۆی پۆلیتەكنیكی سلێمانی سەبارەت بە شێوازی دەوام كردن چەند بڕیارێكی دەركرد و جەختی كردەوە، كە تاقیكردنەوە لەناو كەمپەس بە پەیڕەوكردنی ڕێنماییە تەندروستییەكان بەردەوام دەبن.

ئەنجوومەنی زانكۆی پۆلیتەكنیكی سلێمانی لە ڕاگەیەنراوێكدا ئاماژەی بەوەكردووە، پاڵپشت بەبڕیارەكانی لیژنەی باڵای ڕووبەڕووبوونەوەی كۆرۆنا و ڕاگەیاندنی وەزارەتی خوێندنی باڵا و توێژینەوەی زانستی سەبارەت بەشێوازی دەوامك ردن لەزانكۆكاندا، هەروەها بریارەكانی كۆبوونەوەی ئەنجومەنی زانكۆی پۆلیتەكنیكی سلێمانی ژمارە (٦) لە ٣٠/٣/٢٠٢١ ئەنجوومەنی زانكۆی پۆلیتەكنیكی سلێمانی چەند بڕیارێكی دەركرد.

دەقی بڕیارەكان:
١- وانەخوێندن لەسەرجەم كۆلێژ و پەیمانگاكان دەبێتە ( خوێندنی ئاوێتە) بە شێوازی ئۆنلاین و ئەلیكترۆنی لەرۆژی (1 – 4 – 2021)ەوە، دەسەڵات دەدرێت بە ئەنجومەنی كۆلێج و پەیمانگاكان بۆ میكانزمی جێبەجێكردنی ئەم بڕیارە.
٢- دەسەڵات دەدرێت بە ئەنجومەنی كۆلێج و پەیمانگاكان سەبارەت بە خوێندنی وانە پراكتیكییەكان لەناو كەمپەس بەپێی پێویست و پلانی بەشی زانستی بەڕەچاوكردنی تەواوی ڕێنماییە تەندروستییەكان.
٣- سەرجەم پڕۆسەی تاقیكردنەوەكان لەناو كەمپەس بەردەوام دەبن، بەپێی ئەو خشتەیەی لەكۆلێج و پە‌یمانگاكان دانراوە، بەڕەچاوكردنی تەواوی ڕێنماییە تەندروستییەكان.
٤- بەشەناوخۆییەكان تەنیا بۆ ئەو خوێندكارانە كراوە دەبن كە تاقیكردنەوەیان هەیە یان وانەپراكتیكییان هەیە بە پێی پێویست لەگەڵ جێبەجێكردنی سەرجەم رێنمایی خۆپارێزی .
٥- پرۆسەی خوێندنی باڵا بەردەوام دەبێت بە پێی پلانی خوێندن لەگەڵ جێبەجێ كردنی سەرجەم رێنمایی خۆپارێزی.
٦- ئەم بڕیارانە لە ڕۆژی (١-٤-٢٠٢١) تا ڕۆژی (١٠-٤-٢٠٢١) و دەركردنی ڕێنمایی و بڕیاری نوێی لیژنەی باڵای ڕوبەڕوبونەوەی كۆرۆنا جێبەجێ دەكرێن.