سەردێر

ستافی خەڵك ڕێزلێنانیان پێبەخشرا

خەڵك ـ بەشی هەواڵ

ئەمڕۆ 30ی ئادار ستافی تۆڕی میدیایی خەڵك لەلایەن دەستەی بەڕێوەبەرانی میدیاكەوە ڕێزلێنانی پێبەخشرا.

لەلایەن دەستەی بەڕێوەبەرانی تۆڕی میدیایی خەڵكەوە ڕێزلێنان بەستافی میدیاكە بەخشرا لەبەرامبەر ماندوبوون و خەمخۆری و دڵسۆزی بۆ دەزگاكەیان، بەمەبەستی گەیاندنی زانیاری دروست لەژێر بنەماكانی ئیتیكی ڕاگەیاندن بە هاووڵاتییان.

تۆڕی میدیایی خەڵك یەكێكە لەو دەزگا ڕاگەیاندنانەی بەدرێژایی ماوەی قەیرانی دارایی و بڵاوبوونەوەی ڤایرۆسی كۆرۆنا درێژەی بەكاروانی خزمەت و گەیاندنی زانیاری دروستداوە.

تۆڕی میدیایی خەڵك دامەزراوەیەكی ڕاگەیاندن و ڕووناكبیریی بێلایەنە، لەژێر دروشمی لەخەڵكەوە بۆ خەڵك چەندان ساڵە بۆ خزمەتی سوودی گشتی دامەزراوە، خاوەن كەسایەتییەكی مەعنەوی و سەربەخۆیی دارایی و كارگێڕی و لێهاتوویی خۆیەتی، بایەخدەدات بە كاروباری ڕاگەیاندنی ئەلیكترۆنی، پەخشی ڕادیۆ و بەرهەمی میدیایی.

تۆڕی میدیایی خەڵك لە ڕێگەی دامەزراندن و بەڕێوەبردنی ماڵپەڕی ئەلكترۆنی و ڕادیۆ و پێشكەشكردنی خزمەتگوزاریی میدیایی جۆربەجۆرەوە تێدەكۆشێت بۆ هێنانەدیی ئەم ئامانجانەی خوارەوە:

1.بەشداریكردنی كاریگەرانە لە بنیاتنانی میدیایەكی پیشەكارانەدا كە پابەندی بەها ئیتیكییەكانی كاری ڕۆژنامەنووسی دەبێت.

2.پێشكەشكردنی خزمەتگوزاریی میدیایی بە كوایتیی بەرز بە مەبەستی تواناسازكردنی تاكەكانی كۆمەڵگە و هێنانەدیی پەرەپێدان لە بوارە كولتووری و سیاسی و كۆمەڵایەتی و ئابوورییەكاندا.

3.دروستكردنی ڕای گشتی و فراوانكردنی بەشداریكردنی تاكەكانی كۆمەڵگە لە بڕیارسازی و بنیاتنانی كۆمەڵگەیەكی دیموكراتیی سەقامگیردا.

4.گشتاندن و پشتگیریكردنی كولتووری میانڕەوی و ناتوندوتیژی و چەسپاندنی دیالۆگی بنیاتنەرانە و قبوڵكردنی ئەویتر لەنێوان كولتوور و توێژە جۆربەجۆرەكانی كۆمەڵگەدا.

5.بایەخدان بە خەم و خواستەكانی گشت توێژەكانی كۆمەڵگە و كۆششكردن بۆ ڕووماڵكردنی گرفت و چالاكییەكانیان.

6.كۆششكردن بۆ بنیاتنانی ڕایەڵەی پێگگەیشتن و هاریكاریكردن لەنێوان تاك و توێژەكانی كۆمەڵگە و نێوان ئەوان و دامەزراوە حكومییەكاندا.

7.ڕێزگرتن و پاراستن و لەكەدارنەكردنی بەها ئایینییەكان و كولتووری خەڵكی كوردستان.

ستافە ماندوونەناسەكەی تۆڕی میدیایی خەڵك، 24 كاتژمێر هەوڵدەدات لەماوەیەكی كەمدا زانیاری دروست لەسەرچاوەی باوەڕپێكراوەوە بە خوێنەران و بینەران و بیستەرانی بگەیەنێت.