سەردێر

هاوپەیمانی فەتح، واژوو بۆ پەسەندكردنی بودجە كۆدەكاتەوە

خەڵك-

پەڕلەمانتارێكی عێراق ڕایدەگەیەنێت، سەرقاڵی كۆكردنوەی واژوون بۆ پەسەندكردنی بودجەی عێراق.

حامد موسەوی ئەندامی فراكسیۆنی هاوپەیمانی فەتح لە پەڕلەمانی عێراق لە لێدوانێكی ڕۆژنامەوانیدا ڕایگەیاند، دەستیانكردووە بە هەڵمەتی كۆكردنەوەی واژۆی پەڕلەمانتاران، بۆ ئەوەی چوار شەممە پڕۆژە یاسای بودجە تێپەڕێنرێت.

وتیشی”دەیانەوێت ڕۆژی چوار شەممە یان پێنج شەممەی داهاتوو بە زۆرینە دەنگ بودجەی گشتی پەسەند بكرێت”.

ئەمەش لەكاتێكدایە، بڕیار بوو ڕۆژی یەك شەممەی ڕابردوو پڕۆژە یاسای بودجە پەسەند بكرێت، بەڵام بەهۆی ناكۆكی لایەنەكان لەسەر مادەكانی پڕۆژەكە نەگەیشتنە ڕێكەوتن و هەمان ڕۆژ چەند جارێك وادەی كۆبوونەوەی پەڕلەمان دواخرا، بەڵام دواجار كۆبوونەوەكە بۆ كاتێكی نادیار دواخراوە، بەپێی وتەی هەندێك لە پەڕلەمانتاران، بەشێك لە لایەنە سیاسیییەكان نایانەوێت پڕۆژە یاسای بودجەی ئەمساڵ تێبپەڕێنرێت، بەڵام هیچ لایەنێكیان ئەو جورئەتەیان نییە بیدركێنن، هاوكات بەشێكی تر لە فراكسیۆنەكان دەیانەوێت پەسەندكردنی بودجە بۆ مانگی پێنج دوابخرێت.