سەردێر

“عێراق هێز دژی پەكەكە دەجوڵێنێت”

خەڵك-

فەرماندەی هێزی پاراستنی ئێزدخان ڕایدەگەیەنێت، سوپای عێراق سەرەتای مانگی داهاتووی وەك مۆڵەت دیاریكردووە بۆ هێزە چەكدارییەكانی سەر بە پارتی كرێكارانی كوردستان، تاكو شەنگال چۆڵ بكەن.
میدیاكانی عێراق بڵاویانكردەوە، حەیدەر شەشۆ فەرماندەی هێزی پاراستنی ئێزدخان ڕایگەیاند، سوپای عێراقی یەكی نیسانی وەك مۆڵەت داوەتە هێزە چەكدارەكانی سەر بە پارتی كرێكارانی كوردستان بۆئەوەی ناوەندی شاری شنگاڵ چۆڵ بكەن.
وتیشی”پێشبینی دەكەین، ئەگەر بێت و ئەو هێزانە داوكارییەكەی سوپای عێراق جێبەجێ نەكەن، دوای ئەو بەروارە هێزیان لەدژ بەكاربهێنرێت”.

ئاشكراشیكرد، ئەو هێزانەی سەر بە پەكەكەن لەناو بارەگا حكومییەكانی شاری شەنگالدا جێگیربوون و كۆمەڵێك مەرجیشیان هەیە بۆئەوەی بارەگا سەربازییەكانیان چۆڵ بكەن، كە لە دیارترینیان بریتیە لەوەی ئەندامەكانیان بگوازرێنەوە سەر سوپا و پۆلیسی عێراق، بۆ ئەو مەبەستەش دانوستان لەنێوان هەردوولا بەردەوامە.

ڕوونیشیكردەوە، حكومەتی عێراق سوورە لەسەر ئەوەی ڕێككەوتننامەی شەنگال جێبەجێ بكرێت و هێزە نافەرمییەكان لەناو شەنگال و لەسەر چیای شەنگال نەمێنن.

ئەمەش لەكاتێكدایە، چەند مانگێكە ڕێكەوتن لەنێوان حكومەتی هەرێم و حكومەتی ناوەند كراوە بۆ بەڕێوەبردنی شەنگال بەشێوەیەكی هاوبەش، بەڵام تاكو ئێستا ژمارەیەك هێزی جیاواز لەناوچەكە بوونیان هەیە و نایانەوێت شەنگال چۆڵ بكەن.