سەردێر

سبەینێ‌ لە بەشێكی زۆری عیراق كرا بە پشوو

خەڵك-
بەبۆنەی یادی 15ی شەعبان-ەوە لە بەشێكی زۆری پارێزگاكانی ناوەڕاست و باشووری عیراق ڕۆژێك كرا بە پشووی فەرمی.

یوسف ئیبراهیم، وتەبێژی قایمقامیەتی خانەقین ڕایگەیاندووە، سبەی دوو شەممە 29ی 3ی2021 بە بۆنەی لەدایکبوونی ئیمامێکی شیعەکان لە شاری خانەقین پشووی فەرمییە.

وتیشی، “هۆكاری دیاریکردنی سبەینێ وەک پشووی فەرمی، یادی لەدایكبوونی ئیمام مەهدی ئیمامی دوازدەیەمی شیعەكان و زیارەتی شەعبانییەیە”.

پارێزگای میسان لە بەیاننامەیەكدا ئاماژەی بەوەكردووە، بڕیاریانداوە سبەینێ‌ دوو شەممە 29ی ئادار بەبۆنەی 15ی شەعبان (یادی لەدایكبوونی ئیمامی مەهدی) بكرێتە پشووی لە سەرجەم فەرمانگە حكومییەكان جگە لە خوێندنگەكان، كە لە ئێستادا تاقیكردنەوەیان هەیە.

هاوكات پارێزگای دیوانیە لە بەیاننامەیەكدا ئاماژەی بەوەكردووە، سبەینێ‌ دوو شەممە دەبێتە پشووی فەرمی، بەڵام فەرمانگە خزمەتگوزاری و تەندروستی و ئەمنییەكان و پەروەردە ناگرێتەوە.

هەروەها، نەسیف ختابی، پارێزگاری كەربەلا لە بەیاننامەیەكدا پیرۆزبایی 15ی شەعبان لە موسڵمانان دەكات و دەشڵێت: “بەو بۆنەیەوە سبەینێ‌ دەكرێتە پشووی فەرمی”.

لە هەمان كاتدا، پارێزگاكانی دیالە و نەجەف و واست و چەند پارێزگایەكی دیكە لە بەیاننامەی فەرمیدا بڕیاریانداوە سبەینێ‌ بكرێتە پشووی فەرمی.