سەردێر

” كۆرۆنا لە هەڵكشاندایە”

خەڵك-

قائیمقامی هەولێر ڕایدەگەیەنێت، ئەمڕۆ ڕێكاری نوێ و پێویست بۆ خۆپارێزی لە كۆرۆنا ڕادەگەیەنین.

نەبەز عەبدولحەمید قائیمقامی هەولێر بە (خەڵك)ی ڕاگەیاند، لە بارودۆخێكی باشدا نین و ڕۆژانە ژمارەی تووشبووان و مردوان بە كۆرۆنا ڕووی لە زیادبوونە، ئەمە ئەوە دەگەیەنێت ئێمە لەناو شەپۆلێكی ڤایرۆسەكەین و بەرەو لوتكە هەڵدەكشێین.

وتیشی”ئەگەر خەڵك پابەند نەبێت، ڕووبەڕووی مەترسی دەبینەوە، پابەندبوونی خەڵكیش قەدەغەی هاتوچۆ نییە، چونكە بازاڕ و شوێنە گشتییەكان كراوەن، ئێمە داوامان لە هاووڵاتیان ئەوەیە كە دەمامك ببەستن و خۆیان بەدوور بگرن لە قەرەباڵغی، حكومەتیش چی باش بێت بۆ هاووڵاتیان ئەوە دەكات”.

ئاشكراشیكرد، ئەو لێپێچینەوانەی وەزارەتی ناوخۆ باسی لێوەدەكات پێویستە جێبەجێ بكرێ، پابەندبوونەكانی هاووڵاتیانیش باشە، بەڵام بە دڵی ئێَمە نییە، پێویستە زۆربەی كاسبكاران پابەندبن.

ڕوونیشیكردەوە، ئەمڕۆ كاتژمێر 5 كۆبوونەوەی ژووری ئۆپەراسیۆنەكان ئەنجام دەدەین، باس لە توندكردنی ڕێكارەكان دەكەین كە پێویستە بۆ پاراستنی هاووڵاتیان، لە ماوەی ڕابردووشدا خەڵكێكی زۆرمان سزا داوە و شوێنێكی زۆریشمان داخستووە و پێوستە هاووڵاتی پابەندی ڕێنماییەكان بێت.