سەردێر

لابردنی پاشگری ئیسلامی كۆمەڵ دەشێوێنێت

خەڵك-

كۆمەڵی دادگەری دواجار هەنگاوە قورسەكەی نا بە لابردنی پاشگری ئیسلامی، بەڵام ئەم هەنگاوە كێشەنێوخۆییەكانی زیاد كرد، چونكە بە رای چاودێران پاشخانی كاری كۆمەڵ و جەماوەرەكەی بواری لابردنی پاشگری ئیسلامی نادات، لاشیبدات لەنێوەرۆكدا هیچ ناگۆڕێت،
سەرۆكی كۆمەڵی دادگەری و بەرپرسانی ئەو حزبەش دەڵێن، گۆڕینی ناو گوزارشت نییە لە گۆڕینی نێوەڕۆكی حزب، بەڵكو گۆڕینی ناو كرانەوەیەكە بەڕووی جەماوەردا، بەڵام ئەم گۆڕانكارییە ناكۆكی نێوان حزبەكە و بەتایبەت بەرپرس و دامەزرێنەرانی كۆمەڵی دادگەری تۆخكردەوە و لە ئێستادا ناكۆكییەكان تەشەنەی سەندووە.

لە كۆتاییەكانی مانگی ڕابردوودا كۆمەڵی دادگەری كۆنگرەی سێهەمی خۆی بەست، دوای كۆنگرەكەش كۆمەڵێك گۆڕانكاری لە حزبەكەدا كرا لە گرنگترین ئەو گۆڕانكارییانەش گۆڕینی ناوی حزب بوو بۆ كۆمەڵی دادگەری و لابردنی پاشگری ئیسلامی و گۆڕینی ئەمیر بۆ سەرۆكی حزب.

دڵشاد گەرمیانی یەكێك لە دامەزرێنەرانی كۆمەڵی ئیسلامییە و لە هەژماری خۆی لە فەیسبوك ڕایدەگەیەنێت، لەگەڵ گۆڕینی ناوی كۆمەڵ و لادانی پاشگری ئیسلامی و سڕینەوەی (لا ٳلە إلا اللە)ی سەر ئاڵاكەیان و بەرزكردنەوەی دروشمی كرانەوە نەبووە و بەهەڵەیەكی ستراتیژی گەورەی دەبینێت.

گەرمیانی دەڵێـت “هەموو ئەو قسەو باسەش ئەم بڕیارەی لەسەر بنیاد نراوە، گوایە پاشگرە ئیسلامییەكە بووەتە بەربەست، ئەگەرنا گەورە دەبین و خەڵكانێك لەئاستی باڵا دێنە ناومان و حەوت كورسی تر زیاد دەكەین و دەبین بەحزبێكی جەماوەری و زیاتر فراوان دەبین و زۆر خەیاڵاتی تر، ئێمە وێڕای ئەوەی هیچی بەواقعی نازانین و ئەو جۆرە فراوانبوونە مایەی دڵخۆشیمان نین”.

دڵشاد گەرمیانی یەكێك بووە لە ئەندامانی پێشووی مەكتەبی سیاسی كۆمەڵ و بەشداری دواین كۆنگرەی حزبەكەشی كردووە و ئێستاش یەكێكە لە كەسایەتییە كاریگەرەكانی نێو حزبەكە، دەڵێـت: لەكاتێكدا خودای گەورە بەڕوون و ڕەوانی پێمان بفەرموێت جولەكەو گاورەكان هەرگیز لێتان ڕازی نابن هەتا شوێنی دین و بەرنامەكەیان نەكەون، چۆن دەبێت ئێمە بەقسەی كۆمیسۆن (لا إلە إلا الله) لەئاڵاكەمان دەربێنین؟ و ناوی ئەمیرشیان بەدڵ نەبێ، سەرۆكی لەجێ دانێین و ئەمریكایی و ئەوروپاییەكانیش قەڵس بن بەناوی ئیسلامی بڵێین، مەترسیە لەسەر داهاتوومان.

دڵشاد گەرمیانی ڕاشیدەگەیەنێت، ناوگۆڕین و بەرزكردنەوەی دورشمی كرانەوە، خەونی خەڵكانێكی تر بوو، بەداخەوە بە م. عەلی باپیر هێنرایەدی.

“ئایا ئامانج ئەوە بووە كاری سەرەكیمان ببێتە هەڵبژاردن و خەڵكە هەژارو ماندووەكەی خۆمان بكەینە خزمەتكارو سواڵكەری كۆكردنەوەی دەنگ بۆ كۆمەڵە پۆستێكی حكومی و پەڕلەمانی بۆ خەڵكانێك كە زۆربەیان شەڕو هەڵپەیان بێت لەسەری”

لەكۆتاییدا دەڵێت”ئێمە بۆچی و بەچ نیەتێكەوە دەسمان بەكاری ئیسلامی كردو كۆمەڵمان دورست كردو هەموو تەمەنی خۆمان و ماڵ و منداڵمان كردە قوربانی، بۆ ئەوە بوو خودا لەخۆمان ڕازیكەین یان ئامانجمان ئەوە بوو؟ كاری سەرەكیمان ببێتە هەڵبژاردن و كۆكردنەوەی دەنگ و چوار ساڵ جارێك هەموو خەڵكە هەژارو ماندووەكەی خۆمان بكەینە خزمەتكارو سواڵكەری كۆكردنەوەی دەنگ و پەیژەی دەستخستنی كۆمەڵە پۆستێكی حكومی و پەڕلەمانی بۆ خەڵكانێك كە زۆربەیان شەڕو هەڵپەیان بێت لەسەری بۆ گەشتن بە دونیای خۆیان، بەبێ ئەوەی هیچ سودو بەرهەمێكی بەرچاوی بۆ دین بۆ دونیای خەڵكە هەژارەكەمان نەبێت.

“سیاسەت بەو جۆرە عەقڵیەتەوە ناكرێت كە گۆڕانكارییەكانی كۆمەڵ بە هەڵەی ستراتیژی ناودەبەن”

لای خۆشییەوە، نازم عەبدوڵڵا وەك یەكێك لە دامەزرێنەرانی ئەو حزبە بەبێ ئەوەی ناوی دڵشاد گەرمیانی بهێنێت وەڵامێكی توندی دەداتەوەو دەڵێت گۆڕانكارییەكان بە بڕیاری زۆرینەی كۆنگرە كراون‌و زۆرینەی پارتە ئیسلامییەكانی دنیاش پاشگری ئیسلامییان پێوە نییە و سیاسەت بەو جۆرە عەقڵیەتەوە ناكرێت كە ئەو گۆڕانكارییانە بە هەڵەی ستراتیژی ناودەبەن.

نازم عەبدوڵڵا ڕاشیدەگەیەنێت، دەبێت ئەوكەسانەی قسە لەم بوارانەدا دەكەن، ئاگاداری سەرچاوەكانی سیاسەت بن، بەتایبەت لەم سەردەمەدا كە ساڵانە كەسانی پسپۆڕ و شارەزا دەیان كتێب لەو بوارانەدا بە چاپ دەگەیەنن و دەیخەنە بازاڕەكانەوە.

بەپێی زانیارییەكانی (خەڵك) دوای كۆتاییهاتنی كۆنگرەی كۆمەڵ، ژمارەیەك بەرپرس و ئەندامی ئەو حزبە وازیان لە حزبەكەیان هێناوە و ئاماژەیان بۆ ئەوە كرد، كە ئەوان بەهۆی ئیسلامیی بوونی حزبەكەیانەوە دەستیان بەكاری حزبایەتی كردووە و دەیانەوێ تاكو كۆتایی تەمەنیان بە ناوی ئیسلامییەوە بژین و بمرن.

بەرای بەشێك لە چاودێران ئەو گۆڕانكارییانەی كۆمەڵی دادگەری لە حزبەكەیدا كردووە، تا ئێستا لە چوارچێوەی نێوەرۆكی حزبەكەدا هیچ كاریگەرییان دەرنەكەوتووە، بگرە لە جاران زیاتر داخراوتر دەردەكەون، كە دەبوو لە دوای كۆنگرە وەك سەركردەكانی ئاماژەیان بۆ كردووە كرانەوەیان پێوەدیاربووایە.