سەردێر

داوا لە پارتی دەكرێت، فشارەكانی بۆسەر ئەنەكەسە زیاتر بكات

خەڵك-

ئەندامێكی نوێنەرایەتی ڕێڤەبەری خۆسەری ڕۆژئاوا لەباشووری كوردستان ڕایدەگەیەنێت، هەندێك ململانێ لەنێو لایەنە سیاسییەكانی ڕۆژئاوای كوردستان هەیە كە تاكو ئێستا نەتوانراوە چارەسەر بكرێن.

بەنێوەندگیری ئەمریكا چەندین كۆبوونەوە لەنێوان پەیەدە و ئەنەكەسە لە ڕۆژئاوای كوردستان ئەنجام دراوە، بەڵام تاكو ئێستا نەتوانراوە بگەنە ڕێككەوتنی كۆتایی.

فەتحوڵڵا حوسەینی، ئەندامی نوێنەرایەتی ڕێڤەبەری خۆسەری ڕۆژئاوا لەباشووری كوردستان بە (خەڵك)ی ڕاگەیاند، ئێمە سێ هەنگاومان لەبەردەمدایە، یەكەم بابەتی سیاسی و سەربازی تاوتوێ كراوە، چۆنێتی هاتنی ئەنەكەسە بۆ نێو ئیدارەی خۆسەر لە گفتوگۆدایە و هەموولایەكیش بە مەزڵوم كۆبانێ ڕازین.

وتیشی، “هەندێك ململانێ هەیە، كە تا ئێستا نەتوانراوە چارەسەر بكرێن، لەوانە ئەنجومەنی نیشتمانی كورد لە سوریا (ئەنەكەسە) بەشێكە لە كۆمسیۆنی عەرەبی ئیسلامی، كە توركیا سەرپەرشتی دەكات، كاتێكی دەوێت ئەو پارتە لەژێر هەژموونی توركیا بێتەدەرەوە”.

جەختیشی كردەوە، “ئەگەر هەوڵێك هەبێت لەلایەن پارتی دیموكراتی كوردستانەوە، كە فشارێك بخاتەسەر ئەنەكەسە بە دڵنیاییەوە دەتوانین زووتر بگەینە هەنگاوەكانمان، گەشبینیشین”.