سەردێر

ئیخوان لەسەر ئەوروپا مەترسییە

خەڵك-

لە ساڵوەگەڕی هێرشە تیرۆرستییەكانی بەلجیكادا لە 2016 نێوەندی برۆكسیل بۆ توێژینەوە و مافی مرۆڤ یەكەمین چالاكی پەرلەمانی دوای نەخۆشی كۆرۆنا ساز دەكات بە ناونیشانی هەڵسەنگاندنی رێوشوێنی ئەمنی و سیاسەت، دوای 5 ساڵ لە هێرشەكانی برۆكسێل.

ژمارەیەكی زۆر لە سیاسی و چالاكی دبلۆماسی و راوێژكارانی ئەمنی و پسپۆڕانی تیرۆر و كەسانی پایەبەرز لەسەر ئاستی وەزارەتی بەرگری و هەواڵگری بەشداری دەكەن.

كون میتسۆ ئەندامی پەرلەمانی بەلجیكا و سەرۆكی لیژنەی روبەڕوبوونەوەی تیرۆر لە پەرلەمانی بەلجیكا دەڵێت: مەترسی هەڕەشە تیرۆرستییەكان سەرچاوەكەی لە گروپە ئیسلامییە توندڕۆكانەوەیە بە تایبەت ئیخوان موسلیمین، ئەمە كۆتایی نەهاتووە لەسەر ئەوروپا، گرنگترینی پێكهێنانی رێكخستنی ئیسلامی سیاسییە.

ناوبراو بە پێویستیشی زانی كە گرنگی بدرێت بەهۆشیاری بۆ بەرەوڕووبوونەوەی فكری توندڕۆیی و ئیخوانی لە بەلجیكا.

سەرۆكی لیژنەی بەرەوڕووبوونەوەی تیرۆر لە پەرلەمانی بەلجیكا دەڵێت: رۆڵی سیاسی و بیرمەندەكان گرنگە لە ئەم بوارەدا لەگەڵ پێشكەشكردنی رێنمایی و دانانی ئیخوان لە لیستی رەشدا بەهۆی مەترسیدارییەوە.

لەلایەكی دیكەوە ئەندامی پەرلەمانی ئەوروپا ئەسیتا كانكۆ باسی لە ئەوەكرد پێویستە پۆلیسی ئەوروپی یۆرۆپۆل بەهێز بكرێت هەماهەنگی لەنێوان دەوڵەتانی یەكێتی ئەوروپادا بكرێت.

ئەندامێكی دیكەی پەرلەمان تیۆ فرانكنە كە پێشتر وەزیری كۆچ بووە، دەڵێت: گروپە توندڕۆكان بەتایبەت ئیخوان موسلیمین مەترسییان لەسەر ئەوروپا دروستكردووە، ئیخوان هۆكاری سەرەكییە لە بڵاوكردنەوەی بیری توندڕۆیی پێویستە پێشی پێ بگیردرێت.

ئەمە لەكاتێكدایە ئیبراهیم مونیر هەڵسوڕێنەری ئەمینداری گشتی ئیخوان بۆ كەناڵی الجزیرە ئامادەیی خۆیانی نیشانداوە بۆ گفتووگۆ لەگەڵ حكومەتەكەی عەبدولفەتاح سیسی سەرۆكی میسر بە مەرجێگ لەبەرژەوەندی گەلی میسریدا بێت و سزادراوەكانی ئیخوانیش بگرێتەوە.

ئەم دەستپێشخەرییە ئاشتییەی ئیخوان هاوكاتی نزیكبوونەوەكانی توركیا و میسر و داخستنی كەناڵەكانی ئیخوانە لەلایەن توركیاوە.

لای خۆیانەوە ژمارەیەك میدیاكاری نزیك لە سیسی لە میسر لە چەند لێدوانێكدا دەستپێشخەری ئیخوانیان رەتكردووەتەوە بۆ گفتووگۆ گوتویانە، هیچ گفتوگۆیەك لەگەڵ ئیخوان ناكرێت و ناشبێت ئاساییكردنەوەی پەیوەندیی قاهیرە و ئەنقەرە ببەسترێتەوە بە ئیخوانەوە.

بەپێی سەرچاوەكانی هەواڵ سەركردەكانی ئیخوان بە دوای جێگرەوەی نوێی توركیادا دەگەڕێن، باشترین شوێنیش بۆ ئەوان كەنەدایە، چونكە ئەوروپا ناتوانێت وەك جاران شوێنێكی ئارام بێت بۆ ئیخوان.