سەردێر

مامۆستایان چاوەڕێی مووچەی تەواون

خەڵك

سكرتێری یەكێتی مامۆستایانی كوردستان پێشبینی ئەوە دەكات مووچەی مامۆستایان بەبێ‌ لێبڕین دابەشبكرێت و داخستنی دەرگای خوێندنگەكانیش بە ئازارێكی گەورە ناو دەبات.

ئەحمەد گەرمیانی، سكرتێری یەكێتی مامۆستایانی كوردستان بە (خەڵك)ی ڕاگەیاند، ئاماژەكان لەڕووی دارایی و سیاسییەوە ئەوە دەڵێن كە مووچەی مانگی 4 بەتەواوەتی و بەبێ لێبڕین وەربگیرێت.

دەشڵێت، حكومەت بەڵێنی ئەوەیداوە هەوڵی خۆی بدات بۆ ئەوەی بە زووترین كات كێشەی مووچە چارەسەر ببێت و لەكاتی خۆیی و بەبێ‌ لێبڕین وەربگیرێت.

“ڕێككەوتنی هەرێم و بەغدا چارەسەری كێشەكانە”

سكرتێری یەكێتی مامۆستایانی كوردستان وتیشی، بەرزبوونەوەی نرخی نەوت و دۆلار و زیادبوونی باجەكان و بڕینی ژمارەیەكی زۆر لە مووچە و ئەو چاكسازیانەی لە حكومەت ئەنجامدراون هۆكار دەبن بۆ چارەسەری كێشەی مووچەو ئەگەریش هەرێم و بەغدا ڕێكبكەون كێشەكان بە تەواوی چارەسەر دەبن.

“خەڵك مەترسی كۆرۆنای بە هەندوەرنەگرتووە”

سكرتێری یەكێتی مامۆستایان باس لە بارودۆخی كۆرۆنا دەكات و دەڵێت، بارودۆخی كۆرۆنا قورسەو ئامارەكان ڕۆژانە لە زیادبووندان و لەنێو خوێندنگەكانیش قەرەباڵغیەكی زۆر هەیە، هەرچەندە بڕیار درابوو ڕۆژنا ڕۆژێك دەوام بكرێت بەڵام هێشتا هەر قەرەباڵغن و بەداخەوە لە دەرەوەی خوێندگەكان، لە شوێنە گشتییەكان وەك پێویست پابەندبوون نییە و خەڵك مەترسی كۆرۆنای بەهەند وەرنەگرتووە.

“دووركەوتنەوەی منداڵەكانمان لە خوێندن ئازارێكی گەورەیە”

گەرمیانی وتیشی، ژیانی مامۆستاو خوێندكاران لای ئێمە زۆر گرنگترە لەوەی پرۆسەی خوێندن بەردەوام بێت و ئێمە پابەندین بە بڕیاری لیژنەی باڵای ڕووبەڕووبونەوەی كۆرۆنا لە هەرێمی كوردستان و خوازیارین دەرگای خوێندنگەكان بكرێنەوە، چونكە داخستنی دەرگای خوێندنگەكان و دووركەوتنەوەی منداڵەكانمان لە خوێندن ئازاێكی زۆر گەورەیە.

ئەمە لە كاتێكدایە دوێنێ‌ چوار شەممە، عەبدولسەلام دۆڵەمەڕی، سەرۆكی لیژنەی پەروەردە و خوێندنی باڵای پەڕلەمانی كوردستان لە كۆنفڕانسێكی ڕۆژنامەوانییدا ڕایگەیاند، دەرگای قوتابخانەكان تەنها بۆ پۆلی 12ی ئامادەیی كراوە دەبن و پۆلەكانی دیكە دەوام ناكەن و دەرگای خوێندنگەكان بە داخراوی دەمێننەوە.