سەردێر

پڕۆسەی خوێندن دەستپێدەكاتەوە و چەند بڕیارێكیش بۆ پۆلی 12 دەركرا

خەڵك-
بڕیارە لە كۆتایی ئەم مانگەدا پڕۆسەی خوێندن لە هەرێمی كوردستان دەستپێبكاتەوە و ئەندامێكی لیژنەی پەروەردە و خوێندنی باڵای پەڕلەمانی كوردستانیش دەڵێت: “بۆ دەستپێكردنەوەی خوێندن لیژننەی بالای ڕووبەڕووبوونەوەی كۆرۆنا دوابڕیار دەدات، بەلام داواكارییەكانی خوێندكارانی پۆلی 12 پەسەند كراون”.

بەپێی زانیارییەكانی (خەڵك) لیژنەی پەروەردەی و خوێندنی بالای پەڕلەمانی كوردستان لەگەڵ وەزارەتی پەروەردە بۆ تاوتوێ كردنی ڕەوشی خوێندن و داواكاری خوێندكارانی پۆلی (12)ی ئامادەیی كۆبوونەتەوە و بڕیار دراوە داواكارییەكانیان جێبەجێ‌ بكرێت.

ئاشنا عەبدوڵڵا، ئەندامی لیژنەی پەروەردە و خوێندنی باڵا لە پەرلِەمانی كوردستان بۆ (خەڵك) ڕایگەیاند،دوای ئەوەی لە (17، 18 و 19)ی ئەم مانگە خوێندكارانی پۆلی (12)ی ئامادەیی خۆپیشاندانیان ئەنجامدا، لیژنەی پەروەرده ‌و خوێندنی باڵا لەگەڵ وەزارەتی پەوەردە تاوتوێی چەند پرسێكی كردووە و وەزارەت بڕیاری ئەوەی داوە ئەو ماوەیەی درابووە خوێندكاران، كە 28 ڕۆژ بوو زیاد بكرێت و بكرێتە (40) ڕۆژ تاوەكو خوێندكاران كاتی زیاتریان هەبێت بۆ كۆشش و خۆئامادەكردن.

ئاشكراشی كرد، یەكێكی دیكە لە داواكارییەكانی خوێندكاران ئەوەبوو لەبری ئەنجامدانی 3 تاقیكردنەوە لە هەفتەیەكدا بكرێتە دوو تاقیكردنەوە، بۆیە وەزارەتی پەروەردە ئەوەشی پەسەند كردووە و سەبارەت بە كەمكردنەوەی پڕۆگرامەكانی خوێندن وەزارەتی پەروەردە لیژنەیەكی پێكهێناوە، دەیانەوێت پێداچوونەوەیەك بۆ وەرزی دووەم بكەن.

بەپێی زانیارییەكانی (خەڵك) لە 24ی ئەم مانگەوە، كە دەكاتە سبەینێ‌ پڕۆسەی خوێندن بۆ خوێندكارانی پۆلی 12ی ئامادەیی دەستپێدەكاتەوە و بۆ پۆلەكانی 1ی بنەڕەتی تاوەكو 11ی ئامادەیی لیژنەی ڕووبەڕوووبوونەوەی كۆرۆنا كۆدەبێتەوە و بڕیاری دیكە دەردەكات و وەك ئاشنا عەبدوڵڵا وتی، “ئەوە لە دەسەڵاتی ئەوانە و بڕیاری كۆتایی لەبارەوە دەدەن”.

لای خۆشیەوە، ئامادەیی بێخاڵی نمونەیی لە سلێمانی لە رئاگادارییەكدا، كە لە هەژماری خۆی لە فەیسبووك بڵاوكردۆتەوە، ئاماژەی بەوەكردووە، خوێندكارانی قۆناغی (۱۲) ئاگادار دەكەین، كە ڕۆژی چوار شەممە 24-3-2021 دەوامە و خوێندكارانی قۆناغی (۱٠و ۱۱) ڕۆژی شەممە 27-3-2021 دەوامە.

ڕاشیگەیاندووە، تاقیكردنەوەكان ڕۆژی یەك شەممە 28-3-2021 دەست پێ دەكات بەپێی ئەو خشتەیەی پێشتر دانراوە.