سەردێر

لە مانگێكدا هاووڵاتیان دوو بەشەخۆراك وەردەگرن

خەڵك-
وتەبێژی حكومەتی عیراق ڕایدەگەیەنێت، هاووڵاتیان لە مانگێكدا دوو بەشەخۆراك وەردەگرن.

حەسەن نازم، وتەبێژی ئەنجومەنی وەزیرانی عیراق لە كۆنفرانسێكی ڕۆژنامەوانیدا ڕایگەیاند، “وەزارەتی بازرگانی ئامادەكارییەكانی تەواوى كردووە، تا بەر لە هاتنی مانگی ڕەمەزان بەشەخۆراك بەسەر هاووڵاتیاندا دابەش بكات”.

بە وتەی حەسەن نازم، “لەدوای ئەوەش، لە سەرەتای مانگی ڕەمەزاندا، هاووڵاتیان دووەم بەشەخۆراكیان بەسەردا دابەش دەكرێت”، ئاماژەی بە بەرزبوونەوەی نرخی شتومەك و كاڵاكانیش كرد كە “دەبێتە مایەی تێكدانی ڕەوشی ئابووری وڵات”.

سەبارەت بە پرۆژە یاسای بودجەش، كە هێشتا لەلایەن پەرلەمانەوە پەسەند نەكراوە، وتەبێژی ئەنجومەنی وەزیرانی عیراق ڕایگەیاند، حكومەت ڕێز لەو شیكارییانە دەگرێت، كە بۆ پرۆژە یاساكە دەكرێن، لەگەڵ ئەوەشدا داڕشتنی پشتی بە پاكێجی سپی بەستووە بۆ چاكسازی لە ئابوری وڵاتدا.

لای خۆشیەوە، وەزارەتی بازرگانی عێراق ئاشكرای كردووە، بۆ مانگی ڕەمەزان ڕۆن، شەکر، برنج، ئارد، ئاردی سفر دابەش دەکرێ.