سەردێر

“پێویستە ئەو كەسانەی سەرپێچی ژینگە دەكەن سزا بدرێن”

حكومەت وەك پێویست گرنگی بە پاراستنی ژینگە نەداوە

خەڵك
ساڵانە لەوەرزی گەشتكردن گەشتیاران لەكاتی چونە دەرەوەیان بۆ شوێنە گەشتیاریەكان پاشماوەكانیان بەجێدەهێڵن و ژینگە پیسدەكەن، سەرۆكی ڕێكخراوێكی ژینگەپارێزیش دەڵێت پێویستە ئەو كەسانەی ژینگە پیسدەكەن سزا بدرێن.

مەعروف مەجید، سەرۆكی ڕێكخراوی ئایندە بۆ پاراستنی ژینگە بە (خەڵك)ی ڕاگەیاند،
پێش نەورۆز وەك بۆردی ڕێكخراوەكان لەگەڵ دەستەی پاراستن و چاككردنی ژینگە و دەستەی گەشتوگوزار و لیژنەی باڵای ژینگەی هەرێمی كوردستان كۆبوونەوەیەكی تایبەت دەربارەی ئامادە سازی بۆ هۆشیاركردنەوەی هاووڵاتیان بۆ پاكڕاگرتنی ژینگە لەكاتی گەشتكردنیاندا، بەڵام بەداخەوە ئەو تیمانەی بریار بوو دروستبكرێن لە ئاستی پێویستدا نەبوو پێدەچێت هەریەكێك ڕێكخراو و فەرمانگە پەیوەندیدارەكانی ژینگە چالاكیان ئەنجامدابێت.

“حكومەت وەك پێویست گرنگی بە پاراستنی ژینگە نەداوە”
مەعروف مەجید دەڵێت، ئەوەی كەوایكردووە هاووڵاتیان ژینگەیان خۆش نەوێت حكومەتە، چونكە نەیتوانیوە وەك پێویست گرنگی بە ژینگەبدات، چەندین وەزارەتمان هەیە تا ئێستا كەمترین هۆشاری ژینگەییان هەبووە بەتایبەت وەزارەتی ڕۆشنبیری.

“پێویستە سەرپێچیكاران سزا بدرێن”

سەرۆكی ڕێكخراوی ئایندە دەشڵێت، “پێویستە ئەوكەسانەی سەرپێچی ژینگە دەكەن سزابدرێن ئەگەر حكومەت كۆمەڵێك ڕێكاری یاسایی بەرامبەر ئەو كەسانە بگرێتەبەر لەو باوەڕەدام ئەگەر خەڵك ژینگەكەشی خۆشنەوێت لەترسی سزاكە پیسی ناكات”.

دەشڵێت، ئەوان وەك ڕێكخراوێكی ژینگەپارێز لەسەر ئاستی ڕاگەیاندن چەند دیدارێكیان ئەنجامداوە و لەڕێگەی تۆڕی كۆمەڵایەتیەوە ڕێنمایی تایبەتیان لەبارەی پاراستنی ژینگەوە بڵاوكردووەتەوە.

وتیشی، چەند گرنگە ئێمە هاووڵاتیان هۆشیار بكەینەوە زیاتر گرنگە هاووڵاتیان خۆیان هەست بە بەرپرسیارێتی بكەن بەرامبەر سروشتی جوان و ئەو دیمەنە دڵڕفێنانەی كوردستان، بەڵام بەداخەوە هەر لەسەرەتای وەرزی گەشتكردن كۆمەڵێك پێشێلكاری بەرامبەر ژینگە كراوەو پیسكراوە.

ئاماژە بەوەشدەكات، لە هەرێمی كوردستان لە ساڵی 2003 و دوای پڕۆسەی ئازادی بابەتی ژینگەپارێزی و هێنانی كۆمەڵێك پێداویستی ڕۆژانە وایكردووە پێشێلكارییەكانی ژینگە زیاتر ببێت و بەداخەوە تا ئێستا پاراستنی ژینگە نەبووە بە كلتوور و ئەو كەسانەی لەو بوارەدا كار دەكەن بەچاوێكی نزم سەیر دەكرێن و خەڵك خۆی هۆكارە بۆ پیسكردنی ژینگە.

دەشڵێت، ئەگەر پاراستنی ژینگە لە باخچەی ساوایان تاكو قۆناغی زانكۆو خوێندنی باڵا بكرێت بە یەكێك لە بابەتە گرنگەكان ، كاریگەری باشی دەبێت، ئەگەر منداڵان ڕابهێنرێن لەسەر ئەوەی دەبەی پلاستیك بەكار نەهێنن و لەكاتی یادی لەدایكبونیاندا لەبری كڕینی كێك و شیرینی نەمام بچێنن ژینگەپارێزی دەبێت بە كلتوور.

ئاماژەی بەوەشكرد، یەكێكی دیكەش لە هۆكارەكانی پیسكردنی ژینگە نەبوونی خزمەتگوزاری پێویستە لە شوێنەگەشتیاریەكان و دەكرێت حكومەت تیمی تایبەتمەند دروست بكات بۆ ئەو بابەتە.

لە هەرێمی كوردستان 220 ڕێكخراوی ژینگەیی و 5 بۆردیش لەسەر ئاستی پارێزگاو ئیدارە سەربەخۆكان هەیە.