سەردێر

هۆشداری نەمانی ئاو دەدرێت لە هەرێمی كوردستان

خەڵك-ئارام سەردار

سەرۆكی ڕێكخراوی ئاڤیاری هۆشیاری ژینگەیی ڕایدەگەیەنێت، ڕۆژ بەڕۆژ مەترسییەكانی سەر ئاو زیاتر دەبێت، ئەو ئاوەی بەدەستی هاووڵاتیش دەگات زۆربەیان سەرچاوەكەی ئاوی ژێرزەوین.

ئاسۆ شكاك سەرۆكی ڕێكخراوی ئاڤیاری هۆشیاری ژینگەیی بە(خەڵك)ی ڕاگەیاند، هاووڵاتیان وەك پێویست نین لەڕووی پاراستنی ئاو، چونكە ئاستی هۆشارییان لەڕووی پاراستنی ئاو لەم سێكتەرە گرنگەی ژینگە وەك پێویست نیە، دەبێت هاووڵاتیان گرنگی بدەن بەچۆنیەتی دەستكەوتنی ئاو و بەكارهێنانی.

دەشڵێت”ئەو ئاوەی بەدەستی هاووڵاتی دەگات زۆربەیان سەرچاوەكەی ئاوی ژێرزەوین، ئەمەش بووەتە هۆكاری ووشكبوونی سەرچاوەی زۆرێك لەئاوەكان، لەبەر ئەوە هاووڵاتی دەبێت گرنگی بە بەستنی تەوافەی موبەڕیدە و تانكی ماڵەوە بدەن ئاو بەفیڕۆ نەدەن لەشوشتنی حەوشەی ماڵ و ئۆتۆمبێل”.

ئەوەشی خستەڕوو، ڕۆژ بەڕۆژ مەترسییەكانی سەر ئاو زیاتر دەبێت، بەهۆی گۆڕانكارییە ژینگەییەكان كە وایكردووە بارانی پێویست نەبارێت، ناوچە بەستەڵەكییەكان بەرەو توانەوە دەچن، ئێران و توركیاش لەسەر سەرچاوە ئاوییەكانمان بەنداو دروست دەكەن و ڕێڕەوی ئاویش دەگۆڕن، ئەمەش كاریگەری لەسەر ئاو هەیە بۆ داهاتوو، دەبێتە مەترسی بۆ سەر وشكەساڵی و لەناوچوونی بەرهەمە كشتووكاڵییەكان و ئاژەڵە كێوییەكان.