سەردێر

یەكێتی زانایانی ئایینی ئیسلامی كوردستان لەسەر سەڵاحەدینی ئەیوبی هاتە دەنگ

خەڵك

یەكێتیی زانایانی ئایینی ئیسلامیی كوردستان پەیامێك لەسەر وتەكانی پیر لوقمان حاجی كەریم كە سەبارەت بە سەڵاحەدین ئەیوبی كردوویەتی بڵاودەكاتەوە و دەڵێت “بە توندی ئەو جۆرە كار و هەنگاوە نەشیاوانە رەتدەكەینەوە و سەركۆنەی دەكەین.”

دەقی ڕاگەیەندراوەكەی یەكێتیی زانایانی ئایینی ئیسلامیی كوردستان

بەناوی خوای بەخشندەی میهرەبان

پاش بڵاو بوونەوەی ئەو گرتە ڤیدیۆییە كە لەلایەن كەسێك بڵاوكراوەتەوەو تێیدا سوكایەتی بەرامبەر ئیسلام و رەمزە نەتەوەیی و ئاییینیەكانی گەلی كورد بەتایبەت سیمبولی ئایینپەروەرو سەركردەی مێژوویی سەلاحەددینی ئەیووبی كرد بێ رەچاوكردنی هیچ بنەمایەك.

لەسۆنگەی هەستكردن بە بەرپرسیارێتی ئایینی و پیشەیی بە توندی ئەو جۆرە كارو هەنگاوە نەشیاوانە رەتدەكەینەوەو ئیدانەی دەكەین، لەهەمان كات مەعلومە ئێمە لە كوردستان لە سایەی ئیسلام و شەونخونی زانایانی ئایینی، خاوەن نمونەیەكی جوانی پێكەوەژیان و تەبایی و قبوڵكردنی جیاوازیەكانین و هیچ كاتیش لەو هەڵوێستە پاشەكشە ناكەین و پارێزگاری لە سەقامگیری كۆمەڵگەو ئاشتی و پێكەوە ژیان دەكەین، بەڵام ناكرێ رێگە بدرێت لەو پەنایە سوكایەتی بە پیرۆزییە ئایینی و نەتەوەیییەكان بكرێت و مێژووی پرشنگداری سەركردەیەكی گەورەی وەك سەلاحەددینی ئەیوبی بخرێتە بەر نەشتەری سوكایەتی و گاڵتە پێكردن!

لەگەڵ بڵاوبوونەوەی ئەو گرتە ڤیدیۆییە لە پەیوەندی بەردەوام دابووین لەگەڵ وەزارەتی ئەوقاف و كارباری ئایینی و هەماهەنگ و هاوكار دەبین لەگەڵ وەزارەت بۆ گرتنەبەری سەرجەم رێكارە پێویست و یاساییەكان بۆ رێگە گرتن و دووبارە نەبوونەوەی ئەم حاڵەتانە، لێرەشەوە جارێكی تر داوا لە داواكاری گشتی دەكەین بە ئەركی پێویستی خۆیان هەڵبستن، چونكە ئەم كارە پێچەوانەی یاسا بەركارەكانی عیراق و هەرێمی كوردستانە.

یەكێتیی زانایانی ئاینی ئیسلامیی كوردستان

22ی3ی2021