سەردێر

رێوشوێنی یاسایی دژی زەردەشتییەك دەگیرێتەبەر

خەڵك

گرتەیەكی ڤیدیۆیی كەسێك بەناوی پیر لوقمان كە خۆی وەك زەردەشتییەك ناساندووە و سوكایەتی بە سەڵاحەدینی ئەیوبی كردووە، كاردانەوەی لێكەوتەوە.

رێوشوێنی یاسایی دەگیرێتەبەر

لە كاردانەوەی وتەكانی پیر لوقمان، وەزارەتی ئەوقاف و كاروباری ئاینی هەرێمی كوردستان لەڕاگەیەنراوێكدا بڵاویكردەوە، یەكێك لەبنەما سەرەكی و ستراتیژیەكانی وەزارەتی ئەوقاف وكاروباری ئایینی پێكەوەژیانی ئایینییە و ئێمە بەتوندی ئیدانەی هەركەس و لایەنێك دەكەین بیەوێ بە وشە یان توانج و قسەی نابەجێ یان هەرشێوەیەك هەستی پێكهاتەیەكی تر بریندار بكات.

لە ڕاگەیەنراوەكەدا هاتووە،” ئێمە لەگەڵ لایەنە پەیوەندیدار و یاساییەكان لەپەیوەندیداین بۆ گرتنەبەری رێكاری یاسایی پێویست بەڵام بەهۆی پشوەكانی جەژنی نەتەوەیی نەورۆزەوە بۆ دوای پشوو رێكارەكانمان دواخست”.

سكاڵا تۆمار دەكرێت

لە لایەكی دیكەوە، عەبدولستار مەجید، سەرۆكی فراكسیۆنی كۆمەڵی دادگەری لە پەرلەمانی كوردستان ڕایدەگەیەنێت، سكاڵای یاسایی دژی پیر لوقمان دەجوڵێنێت و دەڵێت، كەسێك بێڕێزی و سوكایەتی بە ئاینی ئیسلام كردووە، بۆیە بە مافی خۆمی دەزانم كە لەیەكەم ڕۆژی دەوامی فەڕمی سكاڵای یاسایی لەسەر ناوبراو لە ڕێی داواكاری گشتیەوە تۆمار بكەم بەپێی ماددەی 372 لە یاسای سزادان.

نوێنەری زەردەشتیان: پیر لوقمان زەردەشتی نییە

یەكێكی دیكە لە كاردانەوەكان ئاوات حیسامەدین، نوێنەری زەردەشتییەكانەو دەڵێت،
” ئێمە ئەو كەسانە بە زەردەشتی نازانین، بەڵكو بە دەنگێك و هەوڵێكی گوماناوی و تێكدەرانە دژ بە دینی زەردەشتی دەزانین”.