سەردێر

توركیا فشارەكان لەسەر هەدەپە چڕدەكاتەوە

خەڵك-

هەوڵەكانی حكومەتی توركیا بۆ داخستنی پارتی دیموكراتی گەلان هەدەپە دەستیپێكردووە بە تۆمەتی پەیوەندییان بە پەكەكەوە، لای خۆیەوە هاوسەرۆكی هەدەپە لە ئیستەنبوڵ ئیلیف بولوت رایگەیاند حكومەت هەوڵ دەدات كارەكانی هەدەپە رابگرێت.

هاوسەرۆكی هەدەپە لە ئیستەنبوڵ بۆ كەناڵی العربیە رایگەیاند حكومەت هەوڵ دەدات كارەكانی هەدەپە رابگرێت بەهۆی ئەوەی هەدەپە وەك لایەنێكی ئۆپۆزسیۆن بووەتە ئاستەنگ لە پێش حزبی فەڕمانڕەوا، لە حوزەیرانی 2015 نەیتوانی بە تەنها حكوم بكات ناچاربوو لەگەڵ بزوتنەوەی نەتەوەیی هاوپەیمانی كرد بۆ تێپەڕاندنی ئەو رەوشە.

دەشڵێت: حكومەت فشاری رۆژانە دەكات لە دژی هەدەپە، پارێزبەندی لە ئەندام پەرلەمانەكانی وەردەگرێتەوە، ئەندامەكانی و سەرۆك شارەوانییەكانی دەستگیر دەكات، هەندێك لە ئەندام پەرلەمانەكان لە زیندانن و ئێستاش هەوڵی داخستنی هەدەپە دەدەن.

رۆژی هەینی رابردوو پۆلیسی توركیا دەیان سەركردە و ئەندامی هەدەپەی بە تۆمەتی پەیوەندییان بە پەكەكەوە دەستگیركرد.

لای خۆیەوە هاوسەرۆكی دیكەی هەدەپە لە ئیستەنبوڵ ئیردل ئافنجی دەڵێت: داخستنی هەدەپە واتای مردنی دیموكراسییە.