سەردێر

كەرەنتینە هاتنی گەشتیارانی بۆ نەورۆز كەمكردەوە

خەڵك – نزار جەزا

بەهۆی كەرەنتینە و تاقیكردنەوەی خوێندكارانەوە، ڕێژەی هاتنی گەشتیار لەشارەكانی عیراقەوە بۆ هەرێمی كوردستان دابەزیوە.

مەحمود تۆفیق سەرۆكی كۆمەڵەی میوانخانە و چێشتخانەكان/ سلێمانی بە (خەڵك)ی ڕاگەیاند، بەهۆی دەستپێكردنەوەی تاقیكردنەوەكان لەشارەكانی عیراق و ڕاگەیاندنی كەرەنتینە لەشارەكانی عیراق، ڕێژەی گەشتیاری عەرەب بۆ نیوە دابەزیوە.

ڕوونیكردەوە، ئەم بڕیارە زیانی بەكەرتی گەشتیاری لەشارەكانی هەرێم گەیاندووە، چونكە بەشێكی زۆر لەگەشتیارەكان لەشارەكانی عیراقەوە دێن.

ئەوەشی خستەڕوو، هەموو كات لەبۆنەكاندا ئامادەكارییان كردووە، لەنەورۆزی ئەمساڵیشدا زیاتر لە ٧٠ چێشتخانە و ڕێستۆرانت كراوەبوون و لەژێر ڕێنماییەكاندا كاریانكردووە.

ئاماژەی بەئەوەشدا، بەهۆی ئەوەی بەشێكی زۆر لەهاوڵاتییان لەدەرەوەی شاربوون، بەشێك لەو چێشتخانە و ڕێستۆرانتانە زیانیان بەركەوتووە، بەڵام لەم بۆنانەدا نابێت ئەو چێشتخانانە دابخرێن، چونكە ئەگەر ژمارەیەكی كەمیشبێت گەشتیار یان هاوڵاتییان سەردانیان دەكەن.

زیاتر ڕوونیكردەوە، لەوماوەیەدا هیچ كێشەیەكیان نەبووە.

باسی لەئەوەشكرد، لەماوەی نەورۆزدا هیچ شوێنێك سزانەدراون، بەهۆی ئەوەی بەڵێنی كردنەوەی چێشتخانەیاندابێت و بەڵێنەكەیان نەبردبێتەسەر.

ساڵانی ڕابردوو ڕێژەیەكی بەرچاو لەگەشتیاری عەرەب ڕوویان لەشارەكانی هەرێمی كوردستان دەكرد، بەڵام ئەمساڵ بەهۆی كەرەنتینە و تاقیكرنەوەی خوێندكارانەوە گەشتیان بۆ هەرێم نەكرد.