سەردێر

81 هەزار گەشتیار چوونە دووكان

خەڵك ـ نزار جەزا

تەنها لەیەكەم ڕۆژی نەورۆزدا نزیكی 81 هەزار گەشتیار و هاوڵاتی ڕوویان لەسەیرانگاكانی دووكان و دەوروبەری كرد.

ڕێژین ڕەئوف بەڕێوەبەری گەشتوگوزاری دوكان بە(خەڵك)ی ڕاگەیاند، بەسوپاسەوە بۆ سەرجەم هێزەكانی ناوخۆ و بەرگری شارستانی و تیمە تەندروستییەكان توانرا نەورۆزێكی زۆر باش بەڕێبكەن و پلانەكان وەك خۆی جێبەجێكرا، بەڵام بەداخەوە لەگوندی سوورقاوشان، كە دوورە لە سەیرانگاكانەوە دوو هاوڵاتی كورد هەوڵی مەلەكردنیان دابوو، بەڵام بەداخەوە یەكێكیان خنكا و تاكوئێستاش تیمەكان بەدوای تەرمەكەیدا دەگەڕێن.

ڕوونیكردەوە، بەپێی بڕیارێكی وەزارەتی ناوخۆ مەلەكردن لەشوێنە گەشتیارییەكان قەدەغەیە، بەڵام هەندێك هاوڵاتی سەركێشی دەكەن و دەچنە دەرەوەی شوێنە گەشتیارییەكان مەلەدەكەن، كە بەئەمەش مەترسی بۆ گیانی خۆیان دروستدەكەن.

لەبارەی ڕێژەی سەردانكەرانی سەیرانگاكانی دووكان و دەوروبەری ناوبراو باسی لەئەوەكرد، بەپێی ئامارە نافەرمییەكان نزیكی 27 هەزار ئۆتۆمبێل تەنها لەیەكەم ڕۆژی نەورۆزدا تاكو ئێوارە هاتوونەتە سنوورەكەیان بۆ سەیرانگاكان دوكان و زێوێ و چەمی ڕێزان و مێرگەپان و سەرگەڵو و بەرگەڵو و تابین، كە بەنزیكی 81 هەزار هاووڵاتی و گەشتیارن.

ڕوونیكردەوە، گەشتیار ئەو كەسانەن كە زیاتر لە 24 كاتژمێر دەمێننەوە، هاوڵاتییانیش كە وەك سەردان بۆ سەیران دێن كەمتر لە 24 كاتژمێر دەمێننەوە.

وتیشی: ئەم هەفتەیە هەمووی پشووە و چاوەڕێدەكەن‌و دواتر ئاماری فەرمی بڵاودەكرێتەوە و دەتوانرێت دەستنیشانی ئەوەبكرێت، كە ڕێژەی سەردانكەر زیادیكردووە یان كەم.

ناوبراو لەبارەی گرانی نرخی كەپرە گەشتیارییەكان ئاشكرایكرد، دوێنێ تیمەكانیان لەنزیكەوە سەردانی هاووڵاتیان و گەشتیارانیان كردووە، هەر كەسێك گلەیی لەبەرزی نرخەكان هەبووبێت، ڕاستەوخۆ چارەسەری كێشەكەی بۆ كراوە.

ڕوونیشیكردەوە، لەئەنجامی ئەو گەڕانەدا نزیكی چوار خاوەنكەپر و شوێنی گەشتیاری سزادران، ئەمەش بەهۆی بەرزی نرخ یان هەڵەتێگەیشتنی نێوان گەشتیار و خاوەنپڕۆژەوە بووە.

دوێنێ یەكەم ڕۆژی نەورۆزبوو، هاووڵاتیانی زۆر و ڕێژەیەك لەگەشتیار ڕوویان لەسەیرانگاكان كرد، بەمەبەستی بەڕێكردنی كاتێكی خۆش.