سەردێر

هاوسەرۆكی گشتی هەدەپە لە نەورۆزی ئامەد: سەردەكەوین

خەڵك-

هاوسەرۆكی پارتی دیموكراتی گەلان هەدەپە رایگەیاند دەیانەوێت سیاسەتی شەڕ بەسەر گەلەكەماندا بسەپێنن.

مەدحەت سەنجار لە گوتاری رێوڕەسمی ملیۆنی شاری ئامەدی باكوری كوردستان رایگەیاند دەیانەوێت سیاسەتی شەڕ بەسەر گەلەكەماندا بسەپێنن، هەوڵ دەدەن هەدەپە دابخەن.

ناوبراو راشیگەیاند بێڕێزی بە ئیرادەی گەل دەكرێت، بەڵام ئێمە سەردەكەوین لەوئەوبارەیەوە دڵنیایی دەدەین.

ئاماژەی بە ئەوەش كرد كەس ناتوانێت هەپەدە بە چۆك بخەن، هەدەپە هیوای ئاشتی و یەكسانییە.

سەنجار داواشی كرد گۆشەگیری سەر عەبدوڵڵا ئۆجەلان رێبەری زیندانیكراوی پارتی كرێكارانی كوردستان پەكەكە كۆتایی پێ بێت.

هاوسەرۆكی گشتی هەدەپە راشیگەیاند ئێمە لەسەر خەبات و تێكۆشانی خۆمان بەردەوام دەبین.

ئەمڕۆ بە بەشداری دەیان هەزار كەس لە شارەكانی ئامەد، وان، شرنەخ، رەیحا و ئیلیخ و چەند شارێكی دیكە رێوڕەسمی نەورۆز بەڕێوەدەچێت.

دوێنێش لە شاری ئیستەنبوڵ بە ئامادەبوونی نزیكەی 100 هەزار كەس رێوڕەسمی نەورۆز بەڕێوەچوو، پەروین بوڵدان هاوسەرۆكی هەدەپە بە جلوبەرگری كوردییەوە گوتاری نەورۆزی خوێندەوە.