سەردێر

وەزیری تەندروستی: ئاگاداری خۆتان و منداڵەكانتان بن

خەڵك-
وەزیری تەندروستی حكومەتی هەرێمی كوردستان بەبۆنەی جەژنی نەورۆز و سەریی ساڵی كوردییەوە پەیامێك بڵاودەكاتەوە و ڕایدەگەیەنێت، هیوادارین بەهار و نەورۆز ببێتە مایەی سەلامەتی و ڕزگاربوونی مرۆڤایەتی لەو پەتا جیهانیەی ئێستا.

د. سامان بەرزنجی، وەزیری تەندروستی هەرێم لە پەیامێكدا ئاماژەی بەوەكردووە، داوا لە هاووڵاتیان دەكەین خۆڕاگر بن و پابەندی ڕێنمایییەكانی تەندروستی و ژینگەپارێزی و سەلامەتی خۆیان و منداڵەكانیان بن، بەردەوام بن لە بەستنی ماسك و دووربن لە قەرەباڵغی و بەركەوتنی ڕاستەوخۆ.

ئاماژەی بەوەشكردووە، و بەڵێن دەدەین بەردەوامبین لە جەنگی دژی ڤایرۆسی كۆڕۆنا بە پاڵپشتی ھەنگاوەكانی حكومەتی ھەرێمی كوردستان و پابەندبوونی ھەمووان بە ڕێنماییەكانی تەندروستی.

دەقی پەیامەكەی وەزیری تەندروستی:

جەژنی نەورۆزتان پیرۆز بێت …
با هەموو پابەندی ئامۆژگاری تەندروستی بین …
بەبۆنەی هاتنەوەی سەری ساڵی نوێی كوردی (2721) و جەژنی نەورۆزی ئەمساڵ، پیرۆزبایی ئاڕاستەی خانەوادەی سەربەرزی شەهیدان و ئەنفالكراوان و پێشمەرگە قارەمانەكان و كوردستانیان و هەموو كوردێكی دڵسۆز لە جیهان بەگشتی و پیرۆزباییەكی گەرم و تایبەت لە خوشك و برایانی هاوكارانمان لە پزیشكان و كارمەندانی تەندروستی و فەرمانبەرانی دامودەزگاكانی تەندروستی دەكەین، هیوادارین ئەم بۆنەیە ببێتە مایەی خۆشی و شادی و سەلامەتی بۆ هەمووان.

لەم بۆنەیەدا، جارێكی تر سەری ڕێز و نەوازش بۆ قوربانیانی پەتای كۆڕۆنا بەتایبەتی بۆ پزیشك و كارمەندانی تەندروستی و فەرمانبەران دادەنوێنین كە لە ئەركی پیرۆزی مرۆڤایەتیان لە بەرەنگاربوونەوەی ڤایرۆسی كۆڕۆنا گیانیان سپارد، ئومێدی لەشساغی و تەمەن درێژی بۆ خانەوادەكانیان دەخوازین.

نەورۆز هەروەك چۆن هاتنی بەهار و نوێبوونەوەی سروشتە، بۆ گەلی كوردستان مانا و مژدەی ژیان و هێما و سیمبولی ئازادیخوازی و ڕاپەرین و سەركەوتن بووە، هیوادارین بەهەمان شێوە ببێتە مایەی سەلامەتی و رزگاربوونی مرۆڤایەتی لەو پەتا جیهانیەی ئێستا و خۆشگوزەرانی و گەڕانەوەی ژیانی ئاسایی بۆ هەمووان.

لێرەوە وێڕای سوپاسی خۆڕاگری هاوڵاتیان لە بەرامبەر ڕێكارەكانی خۆپارێزی و تەندروستی، ڕێز و دەستخۆشی و سوپاسی یەكە بە یەكەی پزیشكان و كارمەندانی تەندروستی لە تیمەكانی خزمەتگوزاری ڕووبەڕووبوونەوەی نەخۆشی ڤایرۆسی كۆڕۆنا دەكەین بۆ ئەركی پیرۆز و شەونخونیان لەپێناو خزمەتكردنی هاوڵاتیان، ئاواتەخوازین هەر سەلامەت و سەربەرز بن.

لێرەوە داوا لە هاوڵاتیانی خۆشەویست دەكەین خۆڕاگر بن و پابەندی ڕێنمایییەكانی تەندروستی و ژینگەپارێزی و سەلامەتی خۆیان و منداڵەكانیان بن، بەردەوام بن لە بەستنی ماسك و دووربن لە قەرەباڵغی و بەركەوتنی ڕاستەوخۆ، بە بوونی هەر نیشانەیەك و گومانێكت، سەردانی سەنتەرەكانی پشكنین و چارەسەری بكەن و بە ماسكەوە لە كەسی بەرامبەرت دوور بكەوە.

دووپات دەكەینەوە و بەڵێن دەدەین بەردەوامبین لە جەنگی دژی ڤایرۆسی كۆرۆنا بە پاڵپشتی ھەنگاوەكانی حكومەتی ھەرێمی كوردستان و پابەندبوونی ھەمووان بە ڕێنماییەكانی تەندروستی.

دووبارە جەژنی ساڵی نوێی كوردی و بەهار و نەورۆزتان پیرۆز بێت، هەر لە خۆشی و تەندروستی و سەلامەتی دابن.
د. سامان بەرزنجی وەزیری تەندروستی
21 ئازار 2021