سەردێر

سووتاندنی تایە بۆ ئاگری نەورۆز قەدەغە كرا

خەڵك-ئارام سەردار
دەستەی پاراستن و چاككردنی ژینگەی هەرێمی كوردستان پلانی خۆی بۆ وەرزی بەهار ئاشكراكرد و سەرۆكی دەستەكەش ڕایدەگەیەنێت، پاراستن ژینگە پێویستی بە هەماهەنگی هەموولایەك هەیە.

عەبدولڕەحمان سدیق، سەرۆكی دەستەی پاراستن و چاككردنی ژینگەی هەرێمی كوردستان لەكۆنفڕانسێكی ڕۆژنامەوانیدا ڕایگەیاند، پاراستن و چاككردنی ژینگە پێویستی بەهەماهەنگی و هاوكاری هەموولایەك هەیە و لەپێناوی گەشەكردنی هۆشیاری ژینگەیی لەگەڵ دەستەی گەشتوگوزار وەزارەتی ئەوقاف و هەروەها ناوەندە ژینگەییەكان و دەزگاكانی ڕاگەیاندن و ڕێكخراوەكانی بواری ژینگە گفتووگۆمان كردوە تاوەكو هۆشیاری ژینگەیی بڵاو ببێتەوە و ژینگەی كوردستان بپارێزین.

دەشڵێت: “كاركردن بەیەكەوە خزمەتی ژینگەی كوردستان دەكات، ڕێكخراوە ژینگەییەكانیش كە لە ئێستادا ٢٢٠ ڕێكخراون لە كوردستان توانیویانە خزمەتی ژینگە بكەن”.

هاوكات لوقمان شێروانی، بەڕێوەبەری ڕاگەیاندن و هۆشیاری ڕایگەیاند، لەڕێگای بڵاوكردنەوەی هۆشیاری داوا لەهاووڵاتیان دەكەن ژینگە بپارێزن و سروشتی ناوچە گەشتیاریەكان تێك نەدەن، لەهەمان كاتدا تیمەكانی ژینگەی هەرێم سەردانی گەشتیاران دەكەن بۆ پێدانی برۆشۆر و نایلۆنی خاشاك بە گەشتیاران.

دەشڵێت: “ساڵانە بەهۆی نەشارەزایی بەتایەی ئۆتۆمبێل هاووڵاتیان ئاگریان دەكردەوە، بۆیە ئێستا ڕێگری لە سووتاندنی تایە و ماددە پلاستییكییەكان دەكەن، چونكە بۆ سەر ژینگە و تەندروستی كاریگەری خراپ جێدەهێڵێت، جگە لەوەش، ئومێد دەكەن هاووڵاتیان لەكاتی چوونیان بۆ سەیران لەو ناوچانەی ،كە گومانی مین و تەقەمەنی لێدەكرێت خۆیان بپارێزن و دەست بۆ بڕینی دار و درەختەكان نەبەن و كانیاو و ڕووبارەكانیش پیس نەكەن”.