سەردێر

قەیرانی ئاو لە رۆژئاوا سەرهەڵدەدات

خەڵك-

ئاستی ئاو لە رۆژئاوای كوردستان بەشێوەیەكی بەرچاو دابەزیوە لە هەفتەكانی رابردوودا بۆیە ئاستەنگی بۆ جوتیارەكانی كانتۆنی كۆبانێ دروستبووە.

بەپێی راپۆرتی میدیای ئەمریكا، بەرپرسانی كورد توركیا تۆمەتبار دەكەن بە دابەزاندنی ئاستی ئاوی روباری فوڕات بۆ ئاستێكی مێژوویی بێ پێشینە.

لای خۆیانەوە بەرپرسانی توركیا وەڵامی تۆمەتەكانیان نەداوەتەوە، بەڵام ئاماژەیان بە ئەوە كردووە كە وڵاتەكەی ئەوانیش دووچاری كەم ئاویی بووە.

چاودێران ترسیان هەیە لە ئەوەی كەمی ئاو ببێتە هۆی تێكدانی سەقامگیری ناوچەكە لە حاڵی بەردەوامی دابەزینی ئاستی ئاودا.

بەرپرسانی ئەنقەرە دەڵێن ئەوان دەناڵێنن بە دەست دابەزینی ئاستی گەورەی ئاوەوە، پێشتر لەكاتی وشكەساڵیدا توركیا ئاوی رووبارەكانی كەمكردووەتەوە.

قەیرانی ئاو كاریگەری لەسەر سوریا و عێراق و وڵاتانی دیكەی ناوچە كردووە بە گوتەی مەهدی حەمدانی وەزیری ئاوی عێراق لە كۆنگرەیەكدا لە بەغدا ماوەیەك لەمەوبەر.

ئەو بەرپرسە عێراقییە دەڵێت لە ساڵانی رابردوودا رووبارەكانی دیجلە و فوڕات روبەڕووی شەپۆلی مەترسیداری وشك بوون بوونەوە.