سەردێر

گەنجێكی كورد بەتەقەی هێزە ئەمنییەكانی ئێران كوژرا

خەڵك-
هاووڵاتییەكی كورد لە ئاكامی تێكهەڵچوونی نێوان هێزە چەكدارەكانی ئێران و خەڵكی گەڕەكی دەڕەدرێژی كرماشان بە تەقەی ئەو هێزانە كوژرا و هاووڵاتییەكی دیكەش بریندار بوو.

ڕێكخراوی مافی مرۆڤی هەنگاو بڵاویكردەوە، ئێوارەی ڕۆژی چوار شەممە هێزە چەكدارەكانی ئێران لە گەڕەكی دەرەدێژی كرماشان تەقەیان لە هاووڵاتیانی دانیشتووی ئەو گەڕەكە كردووە و لە ئاكامی ئەو دەستڕێژەدا لاوێك كوژراوە و كەسێكی دیكەش بە سەختی بریندار بووە.

ئاشكراشی كردووە، سیروان محەمەدی، تەمەن ٢٥ ساڵ و عەلی ئەحمەدی تەمەن ٧٠ ساڵ لە ئاكامی دەستڕێژی هێزە چەكدارەكان بریندار بوون، كە سیروان دوای ئەوەی گوازراوەتەوە بۆ بنكە تەندروستییەكان بە هۆی سەختی برینەكانیەوە گیانی لەدەست داوە.

هەر بەپێی ڕاپۆرتەكە، ئەم تێكهەڵجوونە لە ئاكامی كۆبوونەوەی ژمارەیەك لە دانیشتوانی گەڕەكی دەرەدرێژ و دەستێوەردانی هێزە ئەمنی و چەكدارەكانی ئێران هاتۆتە ئاراوە.

زانیارییەكان باس لەوە دەكەن، كە چەند كەس لە دانیشتوانی گەڕەكی دەرەدێژ لە لایەن چەند كەسێكی دانیشتووی گەڕەكی دەوڵەتئاوا دراونەتە بەر لێدان و كوتان و خەڵكی دەرەدرێژیش بە مەبەستی تۆڵەكردنەوە كۆبوونەتەوە، كە بەهۆی دەستێوەردانی هێزە ئەمنییەكان ئاڵۆزی و پشێوی دروست بووە و لە ئەنجامدا هێزە چەكدارەكان تەقەیان ڕوو بە خەڵك كردووە.