سەردێر

ڕاگەیەنراوێك دەربارەی خوێندكارانی 12ی ئامادەیی

خەڵك-
بەشێك لە ئەندامانی لیژنەی پەروەردە و خوێندنی باڵا و توێژینەوەی زانستی لە پەڕلەمانی كوردستان ئیدانەی هێرشكردنە سەر خوێندكارانی 12ی ئامادەیی دەكەن و ڕایدەگەیەنن، وەڵامدانەوەیان بەلێدان و فیشەك پێشهاتێكی ناجۆری قبوڵنەكراوە.

ژمارەیەك لە ئەندامانی لیژنەی پەروەردە و خوێندنی باڵا لە پەڕلەمانی كوردستان لە ڕاگەیەنراوێكدا پشتیوانی خۆیان بۆ داخوازی خوێندكارانی 12ی ئامادەیی ڕاگەیاندووە و ئاماژەیان بەوەكردووە، “لە ماوەی ڕابردوودا بە بەهانەی كۆرۆنا دەرگای قوتابخانەكان بەداخراوی هێڵدرابونەوە، لەكاتێكدا خوێندگەی تایبەت و زانكۆ تایبەتەكان دەوامیان تێدا دەكرا و حكومەتیش بۆ سەرهەڵنەدانی ناڕەزایی خەمساردبو لە دەستپێكردنەوەی پڕۆسەی خوێندن”.

راگەیەندراوی بەشێك لە ئەندامانی لیژنەی پەروەردەو خوێندنی باڵا و توێژینەوەی زانستی لە پەرلەمانی كوردستان

گوێ نەگرتن و بەهەند وەرنەگرتنی ڕەخنەو پێشنیاری دڵسۆزانی پەروەردە، لەسەر جیاوازی خوێندن لە قوتابخانەو پەیمانگا؟و زانكۆ تایبەت و حكومیەكاندا و خەمساردی لە دەستپێكردنەوەی پڕۆسەی خوێندن، لەدوای شەپۆلی دووەمی كۆرۆناوە چاوەڕێی شپرزی و پاشەكشەی كەرتی پەروەردەی لێدەكرا.

دوای چوار ڕۆژ لە ناڕەزایەتی و بەرزكردنەوەی داواكاری سادەی خوێندكاران بۆ مافی ڕەوای پەروەردەییان، وەڵامدانەوەیان بەلێدان و فیشەك پێشهاتێكی ناجۆری قبوڵنەكراوە.

لە ماوەی ڕابردوودا بە بەهانەی كۆرۆنا دەرگای قوتابخانەكان بەداخراوی هێڵدرابونەوە، لەكاتێكدا خوێندگەی تایبەت و زانكۆ تایبەتەكان دەوامیان تێدا دەكرا و حكومەتیش بۆ سەرهەڵنەدانی ناڕەزایی خەمساردبو لە دەستپێكردنەوەی پڕۆسەی خوێندن.

ئێمە وەك بەشێك لە ئەندامانی لیژنەی پەروەردەو خوێندنی باڵای پەرلەمانی كوردستان، داواكاری خوێندكاران بە ڕەوا دەزانین و داوادەكەین وەزارەتی پەروەردە ڕەچاوی ئایندەی خوێندكاران بكات و داواكاریەكانیان جێبەجێ بكات، گوێنەگرتن لە داواكاری خوێندكاران دەرئەنجامێكی باشی نابێت.

ڕاهی ڕەهبەر
ئاشنا عەبدوڵا
شەمۆل ئاشتی
هەلز ئەحمەد محەمەد
موسلیم عەبدوڵا ڕەسول
فرید یعقوب ایلیا