سەردێر

“زۆرترین سزادراوانی هەولێر لەسەر مادەی هۆشبەر بووە”

خەڵك-ئارام سەردار

بەڕێوەبەری گشتی چاكسازیی كۆمەڵایەتیەكانی هەرێمی كوردستان ڕایدەگەیەنێت، ژمارەی ئەو سزادراوانەی لەساڵی ڕابردوو ئازاد كراون، كەمترە لەژمارەی ئەو سزادراوانەی سزادراون و هاتونەتە نێو چاكسازییەكان، زۆررترین سزادراویش لەهەولێر بووە.

ئەحمەد نەجمەدین بەڕێوەبەری گشتی چاكسازیی كۆمەڵایەتی لەهەرێمی كوردستان لە كۆنفرانسێكی ڕۆژنامەوانیدا ڕایگەیاند، ساڵی ڕابردوو بەهۆی بڵاوبوونەوەی كۆرۆنا ڕێوشوێنی پێویست گیرایەبەر بۆ ئەوەی سزادراوان بەدووربن لەم نەخۆشیە و خۆشبەختانە تاكو ئێستا هیچ سزادراوێك لە هیچ كام لەچاكسازییەكانی هەرێمی كوردستان بە كۆرۆنا گیانی لەدەستنەداوە.

دەشڵێت”ژمارەی ئەو سزادراوانەی ئازاد كراون لەساڵی ڕابردوو كەمترە لەژمارەی ئەو سزادراوانەی سزادراون و هاتوونەتە نێو چاكسازییەكان، بەشێوەیەك ساڵی ڕابردوو بەگشتی ٣ هەزار و ٣٦٠ كەس ئازاد كراون، لەبەرامبەردا ٣ هەزار و ٧٣٢ كەسی تر سزادراون و هاتوونەتە نێو چاكسازییەكان، زۆررترین سزادراویش لەهەولێر بووە و ژمارەی سزادراوانی زیاتر لە 500 كەسە و تۆمەتەكانیشی لەسەری سزادراون بە پلەی یەكەم مادەی هۆشبەر، تیرۆر و دواتر كوشتن و دزی دێت”.

ئەوەشی خستەڕوو، بەگشتی زۆرینەی سزادراوانی نوێ بەپێی مادەی هۆشبەر سزادراون و ئەو بابەتە بەشێوەیەكی بەرچاو زیادیكردووە.

سەبارەت بە ڕێژەی سزادراوان لەچاكسازییەكان، ئەحمەد نەجمەدین وتی”هەر چاكسازییەك زیاتر لە 2000 كەسی تێدایە، لەكاتێكدا نابێت لە 900 كەس لە چاكسازییەكاندا بن.”