سەردێر

“ئەو سەرمایەدارانەی نرخ بەرز دەكەنەوە، سەر بە دەسەڵاتن”

خەڵك-ئارام سەردار

سەرۆكی فراكسیۆنی یەكگرتوو لە ئەنجوومەنی پارێزگای هەولێر ڕایدەگەیەنێت، ئەوەی حكومەت حیسابی بۆ ناكات دامەزراوە چاودێریەكانن.
غازی عەلی بە(خەڵك)ی ڕاگەیاند، حكومەت بێ باكە و ئەوەی خەمی نیە گیرفانی هاووڵاتیە، لەلایەك مووچەیان پێنادات، لەلایەكیتر كەلوپەلی ڕۆژانەیان لەسەرگران دەبێت بەتایبەت سوتەمەنی.

خەڵك: چ پێویستە بۆ هەولێر بكرێت؟
غازی عەلی: لەساڵی ٢٠١٣ەوە كۆمەڵێك پڕۆژەی زۆر هەبوون دەستی پێكرا، بەڵام تەواونەكراون بەشێوەی جیاجیا، بەداخەوە حكومەت پلانی درێژخایەنی نیە، واتە بۆ بەیانی نازانێ چی دەكات، بەڵكو حكومەتی ئەمڕۆیە، لەسەرجەم سێكتەرەكانی ژینگە و تەندروستی و پەروەردە، كۆمەڵێك پڕۆژەی كەرتی پەروەردە تەندروستی و ڕێگاوبان هەن ماون، لەناو چەقی هەولێر گەڕەك هەیە قیرتاونەكراوە، ئەمەش بەهۆی ئەوەی دەبێ چەند كەسێك سوودمەندبێت لەپارەی پڕۆژەكان ئینجا جێبەجێ دەكرێن، وەك ئەوەی حكومەت دامودەزگای نیە تەنها دەبێ كۆمپانیاكان ئەنجامی بدەن، لەكاتێكدا پڕۆژەكان حكومەت خۆی دەتوانێ بەپارەی كەمتر جێبەجێیان بكات.

خەڵك: لەهەندێ شوێن هاووڵاتیان چاوەڕوانی ڕێگاپێدان دەكەن بۆ دروستكردنی خانوو، بەڵام حكومەت ڕێگا نادات؟
غازی عەلی: پارێزگاری نوێی هەولێر بڕیاریداوە كۆبوونەوەیەكی درێژ بە ووردەكارییەوە لەگەڵ ئەنجوومەنی پارێزگا ئەنجامبدات، بەداخەوە دكتۆر فرسەت بڕیاربوو ئەو كارە بكات، بەڵام تەمەن ڕێگەی نەدا، لەسەر پڕۆژەكانی هەشتی حەسارۆك و سیمی خاتووناوە و چەندین گەڕەكی تر و نەبوونی پارك لەزۆربەی شوێنەكان واتە لەنێوان ڕێگای پیرمام و موسڵ، هەروەها گەڕەكە میللیەكان هیچ پارك و باخچەیەكیان بۆنەكراوە، تەنها لەچارەگە زۆنێك پاركی باشی بۆكراوە كەوتوونەتە سەنتەری هەولێر و ڕۆژئاوا و باكور، بەڵام ڕۆژهەڵات و باشووری هەولێر هیچ ئاوڕیان لێنەدراونەتەوە كەهەمووی گەڕەكی هەژارنشین و میللین.

خەڵك: ئەنجوومەنی پارێزگا چ كاریگەریەكی هەیە لەسەر دەسەڵاتی جێبەجێ كردن؟
غازی عەلی: حكومەت نایەوێ حكومەتی دامەزراوەیی بێت، بەتایبەت دامەزراوەی چاودێری كە خۆشەویست نین و فەرامۆش كراون وەك پەڕلەمان و ئەنجوومەنی پارێزگا، ئەوەی حكومەت حیسابی بۆناكات دامەزراوە چاودێریەكانە.

خەڵك: بۆچی ناوە ناوە نرخی بەنزین و سوتەمەنی بەرزدەبێتەوە؟
غازی عەلی: بەرزبوونەوەی نرخی بەنزین و سووتەمەنی یەكێكە لەم قەیرانانەی كەبەردەوام لەگەڵ بەرزی و نزمی بازاڕ كۆنتڕۆڵ لەدەست دەدرێت، حكومەتیش بێ باكە و ئەوەی خەمی نیە گیرفانی هاووڵاتیە، لەلایەك مووچەیان پێنادات، لەلایەكی تر كەلوپەلی ڕۆژانەیان لەسەرگران دەبێت، حكومەتیش نازانێ لەحوكمڕانی پەیڕەوی چ سیستەمێك دەكات ئایا سۆشیالە یان سەرمایەداری یان هەر جۆرێكی تر، بەداخەوە هەر حكومەتێك نەزانێ فەلسەفەی حوكمڕانیەكەی چیە بەمشێوەیە دەبێتە پاشا گەردانی، لەهەرێمی كوردستان و هەولێر بەتایبەت نیشانەی ئەو ئازادیە بێ سەرووبەرەیە كەخەڵكێك لەبازاڕ كاردەكەن و چاودێری حكومەتیان لەسەر نیە.

خەڵك: چارەسەر چیە؟
غازی عەلی: پێویست بوو سوتەمەنی و بەنزین لەژێر كۆنتڕۆڵی حكومەت بوایە، بەڵام ئەو كۆمپانیایە سوتەمەنی حكومەت بەكاردێنێ دەستدرێژی دەكەنەسەر گیرفانی هاووڵاتیان، حەز بە گرانبوونی بازاڕ دەكەن، لەڕابردووش بینیمان خەڵكانێك بەدەیان دەفتەر دۆلار قازانجیان كرد بەبەرزبوونەوەی نرخی چەند كاڵایەك، بەنزینیش بەلایەك كە ئەگەر هەولێر بەنموونە وەربگرین زیاتر لەنیوملیۆن ئۆتۆمبێل لەشارەكە هەیە ڕۆژانە بەنزین بەكاردێنن.

خەڵك: هۆكاری چیە، بەدواداچوونتان كردووە؟
غازی عەلی: كاتێك لەبەرپرسان دەپرسین هۆكارەكەی دەگەڕێننەوە بۆ ئەوەی بەنزین هاوردە دەكرێت و نرخی دۆلاریش دابەزیوە كاریگەری هەیە، بەڵام ئەمە بیانوویەكی لاوازە بۆ حكومەت، چونكە ئەوەی لێی دەخوێندرێتەوە گیرفان پڕكردنی چەند سەرمایەدارێكە، هاووڵاتیش لەهەموو لایەك پێداویستیەكی ڕۆژانەی قوڕگی گیراوە، بۆیە دەبێ حكومەت چاودێری بازاڕ بكات، بەشێوەیەك لەگەڵ هەر گۆڕانكاریەك نرخی پێدایستیەكانی هاووڵاتیان بەرز دەبێتەوە، ئەمەش كارەساتە پێویستی بەبەخۆداچوونەوە هەیە و ئەو سەرمایەدارانەی دەستیان هەیە لەبەرزكردنەوەی نرخ سەر بەدەسەڵاتن.

خەڵك: ئەنجوومەنی پارێزگا چۆن هەوڵی چارەسەری ئەو گرفتانە دەدەن؟
غازی عەلی: حكومەت پلانی نیە، پلانەكانی هەمووی كاتی و ڕۆژانەیە، واتە نازانێ بەیانی چی دەكات، بۆیە بازاڕی بەشێوەیەك ئازادكردووە بووەتە بێ سەروبەری، سەرمایەداری لەناكاو زۆربووە لەسەر گیرفانی هاووڵاتی، ئەمەش بۆ داهاتوو كاریگەری خراپی دەبێت بۆ سەر حكومەت، ناكرێت لەشارۆچكەی مەخموور لیترێك بەنزین بە ٤٥٠ دینار بێت لەهەرێم بەزیاتر لە ٦٥٠ دینار بێت، وەكو لیژنەكانیش بەدواداچوون دەكەین، بەڵام دامەزراوە شەرعیەكان ناتوانن لێپێچینەوە لەم كەسانە هۆكارن بكەن، چونكە حكومەت ڕێگای پێداون.