سەردێر

پەرلەمانتارێك: بەڕێككەوتن بودجە تێدەپەڕێنرێت

خەڵك-
پەرلەمانتارێكی فراكسیۆنی سادیقون لە پەرلەمانی عیراق ڕایدەگەیەنێت، ڕێككەوتن كراوە بۆ تێپەڕاندنی بودجە لە پەرلەمان، لەئێستاشدا تەنیا چاوەڕوانی ڕێكەوتنی كۆتایی لەگەڵ هەرێمی كوردستان دەكەن، تا لە دانیشتنەكانی داهاتووی پەرلەماندا پرۆژە یاساكە دەنگی لەسەر بدرێت.

فازڵ فەتلاوی، پەرلەمانتاری فراكسیۆنی سادیقون بە (خەڵك)ی ڕاگەیاند، “ئێمە لەئێستادا پێداگرین لەسەر ئەوەی پرسی بودجە تەواو ببێت و لە لەنێو پەرلەماندا بە كۆدەنگی فراكسیۆنە سیاسییەكان دەنگی لەسەر بدرێت”.

بە وتەی فەتلاوی، “لەئێستادا شاندی هەرێمی كوردستان لە بەغدایە، بۆیە چاوەڕوان دەكەن، لەم یەك دوو ڕۆژەدا لەدوای یەكلایی كردنەوەی پرۆژە یاسای دادگای فیدراڵی، كێشەكان لەسەر بودجە چارەسەرببن و بەرەو ئاوابوون بچن”.

پەرلەمانتارەكەی هاوپەیمانی سادیقون دەڵێت: “ڕێككەوتن كراوە بۆ تێپەڕاندنی بودجە، بۆیە هیوادارن هەموان بە برایانی هەرێمی كوردستانەوە لە خەمی یەكلایی كردنەوەی كێشەكاندابن و ڕەچاوی دادپەروەری لەنێوان پارێزگەكاندا بكەن، لەئێستاشدا هەمووان لە خەمی ئەوەدان ئەمڕۆ یان سبەینێ‌ تەواوی ئەو كێشانەی هەن چارەسەربكرێن و ڕێككەوتنی یەكلاكەرەوە بۆ تێپەڕاندنی بودجەدا بكرێت”.