سەردێر

نەورۆزێکی تایبەت لەقەندیل پیرۆزدەکرێت

لەهەموو شار و شارۆچکەکانی هەرێم پاس بۆ چوونە قەندیل دابینکراوە

 

خەڵک – نزار جەزا

 

٢١\٣\٢٧٢١ یەکەم ڕۆژی ساڵی نوێی کوردییە و لەبناری قەندیل بەدروشمی (بەڕوحی سەرکەوتنی گارە، نەورۆزی ئازادی پیرۆزدەکەین) ڕێوڕەسمی بەخێرهاتنی ساڵی نوێ بەڕێوەدەچێت.

 

محەمەد حەسەن، هاوسەرۆکی شارەوانی بناری قەندیل و ئەندامی کۆمیتەى ئامادەکاری بۆنەى نەورۆز لەبناری قەندیل بە(خەڵک)ی ڕاگەیاند، هاوشێوەی ساڵانی پێشتر نەورۆز لەبناری قەندیل بەبەشداری ژمارەیەک لەهونەرمەندان و هاوڵاتییان پیرۆزدەکرێت، بۆئەو مەبەستەش ئامادەکاری تەواوی بۆ کراوە.

 

ئاماژەى بەئەوەشدا، بەپێی کارنامەکە لەکاتژمێر ١١ی پێشنیوەڕۆوە ڕێوڕەسمەکە بەڕێوەدەچیت و هەریەکە لەهونەرمەندان (دیار دەرسیم، شیلان عوسمان، ناسری ڕەزازی، گروپی شەهید سەرحەد، ژینا سەقزی، بەختیار ساڵح، چۆپی فەتاح) بەشدارن.

 

ئەوەشی خستەڕوو، بانگەوازییان بۆ سەرجەم هێز و لایەنە سیاسییەکانی باشووری کوردستان و سەرجەم هاوڵاتییان ناردووە، بۆئەوەی بەشداری ئەو بۆنەیە لەبناری قەندیل بکەن.

 

باسی لەئەوەشکرد، لەڕووی ئەمنییەوە ئامادەکاری دەکرێت و لەئێستاوە خەریکە بەرەو کۆتایی دەچێت، لەماوەى ئەمساڵیشدا بۆردومانەکانی تورکیا بەراورد بەساڵانی پێشوو کەمبوونەتەوە و هیچ ساڵێک هیچ مەترسییەکی ئەمنی نەبووە بۆسەر ئەو بۆنەیە.

 

وتیشی: هەروەها لەڕووی کەشوهەواشەوە ئەگەر بارانبوو ئامادەکاری بۆ کراوە.

 

لەبارەى ڕێگری بازگەکان بۆ چوونە قەندیل ناوبراو دەڵێت: بانگەوازیان بۆ هەموو لایەنە سیاسییەکانی کردووە کە بەشداری بۆنەکە بکەن و هیوادارین هیچ کێشەیەک دروستنەبێت بۆ ئەو کەسانەى دەیانەوێت بەشداری بۆنەکە بکەن.

 

ئەوەشی خستەڕوو، ساڵانی پێشوو بەهەزاران کەس بەشدارییان کردووە، بۆیە ئەمساڵیش پێشبینی دەکەن بەهەزاران کەس بەشداری بکەن.

 

باسی لەئەوەشکر، خواردن و خواردنەوە بۆ ئەو کەسانە ئامادەکراوە، کە بەتایبەت بانگێشتکراون، ئەوانی دیکەش کە بەشداریدەکەن گەشت و سەیرانی خۆیان دەکەن و بەشداری بۆنەکەش دەکەن، بۆیە پێویستە خۆیان ئامادەکاری بۆ بکەن، چونکە خەڵکەکە زۆرە و ئامادەکردنی خواردن بۆیان کۆنتڕۆڵناکرێت.

 

ئاماژەى بۆئەوەشکرد، لەچەند شوێنێک پاس دابینکراوە و لەئێستاوە هاوڵاتییان دەتوانن پەیوەندی بەو ژمارە مۆبایلەوە بکەن، کە لەئاگادارینامەکاندا بڵاوکراونەتەوە، بۆئەوەی ناوی خۆیان بنوسن.

 

هاوشێوەی بناری قەندیل لەگردی مامەیارەی شاری سلێمانی هاوشێوەی ساڵانی پێشتر ئاگری نەورۆز دەکرێتەوە و ڕێوڕەسمێکی شایستە بەڕێوەدەچێت.