سەردێر

سعودیە داوای كڕینی فڕۆكەی توركی دەكات

خەڵك-

سەرۆكی توركیا رەجەب تەیب ئەردۆغان رایگەیاند سعودیە داوای كڕینی فڕۆكەی بێفڕۆكەوانی توركی كردووە.

توركیا كوژرانی رۆژنامەوانی ئۆپۆزسیۆنی سعودی جەمال خاشقچی لە نێو كونسوڵخانەی عەرەبستان لە ئیستەنبوڵ قۆستەوە لە ساڵی 2018 بەهۆیەوە لە دژی سعودیە بەكاریهێنا، گرژی لەنێوان هەردوو دەوڵەتدا دروست بوو، سەرەڕای نیگەرانییەكانی عەرەبستان لە ئەنقەرە بەهۆی پشتیوانیكردنی ئیخوانەوە.

لای خۆیەوە عەرەبستان بڕیاری بایكۆتی كاڵای توركی دا لە نێو وڵاتەكەیدا.

رەجەب تەیب ئەردۆغان لە لێدوانەكەیدا رەخنەی گرت لە ئۆپەراسیۆنی عەرەبستان و یۆنان لە ئەم ماوەی دواییدا لە كاتێكدا ئەنقەرە لەگەڵ ئەسینا لە ناكۆكیدایە لەسەر ناوچە دەوڵەمەند بە سامانە سروشتییەكانی خۆرهەڵاتی دەریای نێوەڕاست.

ئەردۆغان بە بێ ئاشكراكردنی وردەكارییەكان ئاماژەی بەوەكرد، لە ئەم ماوەی دواییدا ریاز داوای كڕینی فڕۆكەی بێ فڕۆكەوانی كردووە كە كاراییان سەلمێندراوە لە شەڕەكانی سوریا و لیبیا و قەرەباغ.

توركیا هەوڵ دەدات پەیوەندییەكانی لەگەڵ سعودیە و ئیمارات و میسر ئاسایی بكاتەوە لە دوای ناكۆكییەكانی رابردوو.

بەپێی سەرچاوەكان توركیا بە نیازە گروپە چەكدارەكانی ئۆپۆزسیۆنی سوریا بنێرێت بۆ شەڕی حوسییەكان لە یەمەن و دەنگوباسیش هەیە كە فڕۆكەی بێفڕۆكەوانیشی ناردبێت.

ئەم هەنگاوانەی ئەنقەرە لە دوای دروستبوونی ئاڵۆزی دێت لەنێوان توركیا و ئێران بەتایبەت لەسەر دۆسێی شەنگال.