سەردێر

پەروەردەی عیراق كاتی تاقیكردنەوەكانی دیاریكرد

خەڵك-
وەزارەتی پەروەردەی عێراق كاتی تاقیكردنەوەكانی كۆرسی یەكەم و نیوەی ساڵی بۆ ساڵی خوێندنی 2020- 2021ی بۆ سەرجەم قۆناغەكانی خوێندن دیاری كرد.

وەزارەتی پەروەردەی عیراق لە گشتاندنێكدا بۆ سەرجەم بەڕێوەبەرایەتییە گشتییەكانی پەروەردە “جگە لە هەرێمی كوردستان” كاتی تاقیكردنەوەكانی كۆرسی یەكەم و نیوەی ساڵی بۆ ساڵی خوێندنی 2020- 2021ی بۆ سەرجەم قۆناغەكانی خوێندن دیاری كرد.

بەپێی گشتاندنەكە، كە واژۆی وەزیری پەروەردەی لەسەرە و وێنەی دەست (خەڵك) كەوتووە، “ڕەزامەندی فەرمی وەرگیرا بۆ دەستپێكردنی تاقیكردنەوەكانی نیوەی ساڵ و كۆتایی كۆرسی یەكەم بۆ خوێندكارانی سەرەتایی و ناوەندی”.

ئاماژە بەوەشكراوە، لیژنەی هەمیشەیی تاقیكردنەوەكان ڕۆژی شەممە 20ی ئازاری دیاری كردووە بۆ دەستپێكردنی تاقیكردنەوەكان و هاوكات لە ڕۆژی دوو شەممە 29ی ئازار تاقیكردنەوەكان كۆتاییان دێت، بەڵام تاقیكردنەوەكانی ناوەندی لە ڕۆژی چوار شەممە 31ی ئازار كۆتاییان دێت.

جەختیشی كردۆتەوە، كە ڕۆژانی شەممە دەخرێتە ناو ڕۆژانی ئەنجامدانی تاقیكردنەوەكانەوە و خشتەی تاقیكردنەوەكانیش لەلایەن بەڕێوەبەرایەتی خوێندنگەكانەوە دیاری دەكرێت و دەبێت ڕێكارە خۆپارێزییەكان پەیڕەو بكرێن.