سەردێر

مەلا بەختیار: بەرپرس هەیە لەمەرگەساتی هەڵەبجەدا پەنجەی ژنانیان بڕیوە بۆ ئەڵقە و ئەنقوستیلەكانیان

خەڵك-
بەرپرسێكی باڵای یەكێتیی نیشتمانیی كوردستان ڕایدەگەیەنێت، بەرپرس هەیە، كە پلەی سەربازی گەورەی هەیە لە كاتی مەرگەساتی هەڵەبجەدا پەنجەی ژنانیان بڕیوە بۆ ئەڵقە و ئەنقوستیلەكانیان و لە ڕۆژهەڵاتی كوردستان فرۆشتویەتییەوە.

مەلا بەختیار، ئەندامی ئەنجوومەنی باڵای سیاسی و بەرژەوەندییەكانی یەكێتی لە هەژماری خۆی لە فەیسبووك لە “كورتیلە ڕەخنەی سیاسی” بە ناونیشانی (دزەكانی كارەساتی هەڵەبجە) ئاماژەی بەوەكردووە، كە یادی هەڵەبجە دەكرێتەوە، جگە لە فاشیەتی بەعس، لە ناخمدا، برینێكی تر دەكولێتەوە. ئەویش زامی ئەو تاوانبارانەیە، كە لەكاتی مەرگەساتەكەدا، بەناو شارەكەدا گەڕاون و تەرم تەرم هەڵیانداونەتەوە و ملوانكەی ژنان و ئەنگوستی دەستیان و سەعاتەكانیان كۆكردۆتەوە. دەستی تاوانیان بردۆتە گیرفانی قوربانیەكان و پارەكانیان دزیووە.

ئاماژەی بەوەشكردووە، لە خەڵكی باوەڕپێكراوم بیستووە كە، تاوانباری وا هەیە (هەن ماوون و هەشن نەماوون) پەنجەی ئاوساوی دەستی ژنانیان بڕیوە، هەتا ئەڵقە و ئەنگوستیلەكانیان ببەن، ماڵانیان تاڵان كردووە و لە ڕۆژهەڵاتی كوردستاندا فرۆشتویانە.

دەشڵێت: “لەم تاوانبارانە هەیە كاربەدەست و پلەی سەربازی گەورەیان هەیە! من ئێستاش قسەیان لەگەڵ ناكەم!”.

ئەمڕۆ 16-3، ماوەی 33 ساڵ تێدەپەڕێت بەسەر كارەساتی كیمیاباران كردنی شاری هەڵەبجە لەلایەن ڕژێمی بەعسی عیراقەوە.