سەردێر

“ستەم و نەهامەتییەكان، ڕوخساری هەڵەبجەییەكانی ماندوو شەكەت كردووە”

خەڵك-تەنیا هەورامی

كۆمەڵناسێك ڕایدەگەیەنێت، رووداوەكانی هەڵەبجە وایكردووە ڕووخساری هەڵەبجەییەكان ماندوو شەكەت دەركەوێت.
ئەمڕۆ 33 ساڵ بەسەر كیمیابارانكردنی هەڵەبجەدا تێپەڕ دەبێت، و تاكو ئێستا دانیشتوانی شارەكەو زیانمەندانی ڕووداوەكە لەلایەن هەردوو حكومەتی عێراق و حكومەتی هەرێم قەرەبوو نەكراونەتەوە.

زانا ئەحمەد ڕۆژنامەنووس و كۆمەڵناس بە (خەڵك)ی ڕاگەیاند، ئەگەر لای خەڵكیتر ئەمڕۆ ڕۆژێكی ئاسایی بێت، ئەوا بۆ هەڵەبجەییەكان و هەموو كورد بیرەوەرییەكی تاڵی هەیە، هەمیشە هەڵەبجەییەكان لەم ڕۆژەدا ڕووداوەكانیان بیر دەكەوێتەوە.

وتیشی”ئەو ڕۆژانەی دەسەڵاتدارانی عێراق ستەمیان بەرانبەر بە هەڵەبجە كرد، لە ئێستاشدا هەڵوێستی بەرپرسانی كورد، بیرەوەرییە تاڵەكانی ئەوكاتە وەبیر هەڵەبجەییەكان دەهێنێتەوە، چونكە دوای 33 ساڵ هەڵەبجەییەكان داوای پڕۆژە و چاوەڕێی پڕۆژە دەكەن، داوای چارەسەركردنی برینداران و بەدواداچوونی ونبووان دەكەن، لەبەرئەوە هەڵەبجەییەكان ئەو بیرەوەرییانەی لەگەڵ حوكمرانەكانی عێراق هەیانە لەگەڵ ئەوانەی هەرێمیش هەیانە”.

ئاشكراشیكرد، بەشێك لە كەسوكاری شەهیدان دەستگیرۆیی كراون، بەڵام نزیكە بە 600 بنەماڵەی شەهید هەیە تاكو ئێستا لە وەرگرتنی خانو سوودمەند نەبوون.

ڕوونیشیكردەوە، لە بەیانامەكەی سەرۆكی حكومەتی هەرێم كە ئاشكرایكرد، 30 ملیار دینار بۆ هەڵەبجە تەرخان كراوە سەیری پڕۆژەكانم كرد، هەموو ئەو پڕۆژانە بوون كە لە كابینەی پێشوو بەردی بناغە و بودجەی بۆ تەرخان كرابوو، تەنها ئەوەی سەیر بوو كڕینی 9 محاویلەی كارەبا بوو كە لەم یادەدا پێشكەشی هەڵەبجەیان كرد.

ئاماژەی بۆ ئەوەش كرد، ئەگەر بێیتە هەڵەبجە، هەست دەكەیت ئەم شارە لە ماوەی ڕابردوودا دووچاری چەندین كێشە و ستەم بووەتەوە، ئەم شارە لە ڕابردوودا پشكی هەیە لە هەموو ڕووداوەكان ئەمە وایكردووە ڕوخساری هەڵەبجییەكان ماندوو شەكەت دەركەوێت، بەڵام ئەگەر حكومەت بیتوانایە دەستگیرۆیی زیانمەندانی بكردایە لەوانەیە بەشێكی كێشەكانی دانیشتوانەكەی چارەسەر بكردایە.