سەردێر

پەڕلەمانتارێكی پارتی بایكۆتی دانیشتنی پەرلەمانی كرد

خەڵك
پەڕلەمانتارێكی پارتی بەهۆی دیاری كردنی دووخولەك قسەكردن لەسەر هەڵەبجە بۆ ئەندامان، بایكۆتی دانیشتنی پەڕلەمانی كرد و دەڵێت، خەڵكی هەڵەبجە بێزاربووە لەگریان و شیوەن.

پێشەوا هەورامانی، وتەبێژی فڕاكسیۆنی پارتی لەپەڕلەمانی كوردستان لەلێدوانێكی ڕۆژنامەوانیدا ڕایگەیاند، ئەمڕۆ ڕۆژێكی ناخۆشە، لەسەر داوای ژمارەیەك پەڕلەمانتاریش ژمارەیەك لەوەزیر و بەرپرسانی حكومەت هاتنە پەڕلەمان تاوەكو كێشە و گرفتەكانی پارێزگاكەیان پێ بدەین، بەڵام لەكاتی دانیشتنەكە سەرۆكی پەڕلەمان دووخولەك مۆڵەت دەدات قسە بكەین، دەپرسم چۆن دەتوانرێت بەم كاتە كەمە باس لەكێشەكانی هەڵەبجە بكرێت، لەكاتێكدا كات هەیە بۆ شەڕەقسەو موزایەدە، بەبێ ئەوەی ڕێگەت بدەن وەك هەڵەبجەییەكی ئاگادار لەكێشەكانی شارەكە باس لەگرفت و پێویستەكانی هەڵەبجە بكەی.

دەشڵێت، ئازارەكانی هەڵەبجە بەدوو خولەك باس ناكرێن، پێمان باش بوو باس لە كێشەی ئەنجوومەنی پارێزگاكە بكەین و نەكرێتە قوربانی ململانێی سیاسی و كورسی و پۆست بەقوربانی پایتەختی ئاشتی بكرێت، هەروەها ویستمان باس لەپڕۆژەكانی وەبەرهێنان بكەین كە لەناو شارەكەدا بن، منداڵە وونبووەكان تووشی سەرگەردانی نەبن، گەنجان لەدۆخێكی خراپی بێ كاریدان.

وتیشی، داواكاریەكان لە٧٠٪ی پەیوەندی بەبوونی پارەوە نیە، جێگای دەست خۆشیە سەرۆكی حكومەت ٣٠ ملیار دیناری بۆ پارێزگاكە تەرخان كردوە، بەڵام زامەكانی هەڵەبجە گەورەن.

ئەوەشی خستەڕوو، بایكۆتی دانیشتنەكەم كرد، چونكە هەڵەبجە وەك شارۆچكەیەك فەرمانبەری هەیە و بۆ واژۆیەك دەبێت بچێتە شوێنی تر،بۆیە هەڵەبجە پێویستی بەكارە و لە گریان و شین و لاواندنەوە بێزار بووە.