سەردێر

“حكومەت، بەبیانووی قەیرانی دارایی حساب بۆ هەڵەبجە ناكات”

خەڵك-تەنیا هەورامی

ئابووریناسێك ڕایدەگەیەنێت، بوون بەپارێزگا، كۆمەڵێك بنەماو ڕەگەزی سەرەكی هەیە دەبێت دابینبكرێت بەداخەوە هێشتا پێكهێنەرەكانی بەپارێزگابوونی هەڵەبجە دابین نەكراوە.
ئەمڕۆ 33ەمین ساڵیادی كیمیابارانكردنی شاری هەڵەبجەیە لەلایەن ڕژێمی پێشووی عێراق و بەهۆیەوە 5 هەزار كەس شەهید بوون و بە هەزاران كەسی دیكەش بریندار و ئاوارەی وڵاتان بوون.

سەركۆ یونس ئابووریناس و دانیشتووی پارێزگای هەڵەبجە بە (خەڵك)ی ڕاگەیاند، هەڵەبجەی دوای بە پارێزگابوونی گۆڕانكارییەكی ئەوتۆی بەسەردا نەهاتووە، كەشیاوی ئەو خزمەت و خەباتە بێت كە هەڵەبجە پێشكەشی كردووە بە كوردو كوردستان.
ووتیشی”بوون بەپارێزگا، كۆمەڵێك بنەماو ڕەگەزی سەرەكی هەیە دەبێت دابینبكرێت بەداخەوە هێشتا پێكهێنەرەكانی بەپارێزگا بوون دابین نەكراوە”.

ئاشكراشیكرد، لەڕووی ئابورییەوە، چاوەڕوانی گۆڕانكاری گەورە و پڕۆژەو خزمەتگوزاری و ژێرخانی ئابوریی بووین، بەڵام داهات و سەرچاوەكانی داهات هێشتا هەروەك پێشووە.

ڕوونیشیكردەوە، هەنگاوی زۆر گرنگ هەیە، كە دەتوانرێت لەڕووی ئابورییەوە بەرەوپێش ببرێت، لەوانە، كردنەوەی خاڵی سنووری سازان كەنزیكەی ١٥ كیلۆ مەتر لەسەنتەری شارەوە دوورە، هەروەها پڕۆژەی پردی تووەقووت و كە دووری نێوان سنوری ئیداری هەڵەبجە و دەربەندیخان و گەرمەسێر نزیك دەكاتەوە، هەروەها
لەڕووی كەرتی كشتوكاڵ و گەشتوگوزارە و سنوورەكە هەموو ڕەگەزەكانی ئەم دووكەرتە گرنگەی تێدایە، پێویستە بەپلانی درێژخایەن و بەپشتگیری دارایی گەشەیان پێبدرێت.

جەختی لەوەش كردەوە، بەداخەوە، حكومەتی هەرێم حسابی تەواو بۆ ئەم پارێزگایە ناكات، بەبیانووی قەیرانی دارایی و نەبوونی بودجە و هەندێجار ململانێی سیاسی ئاوڕی جددی لە هەڵەبجە نادەنەوە، بەداخەوە لەبودجەی پەرەپێدانی پارێزگاكان تەنها (2%)ی هەرێم تەرخانكراوە بۆ هەڵەبجە، كەتەنها (30)ملیار دیناردەكات، بەم بڕەش ناتوانرێت پەرە بەكەرتەگرنگەكانی پارێزگاكە بدرێت تەنها دەتوانرێت هەندێ پڕۆژەی خزمەتگوزاری و كۆمەڵایەتی بوارەكانی تەندروستی و پەروەردەی پێئەنجام بدرێت، لەبەرئەوە بەداخەوە هەڵەبجەو كارەساتەكەی تەنها لە١٦ی سێ دا بیری حكومەت و لایەنەسیاسییەكان دەكەوێتەوە.