سەردێر

شەنگال لە ململانێی بەرژەوەندیخوازەكاندا بە وێرانی مایەوە

پەكەكە و پارتی و بەغدا و ئێران و توركیا لە شەنگال بە دوای بەرژەوەندی خۆیانەوەن

خەڵك-

دوای چەندین كۆبوونەوە لەنێوان هەرێم و ناوەند، گەیشتنە ڕێكەوتنێك بۆ چۆڵكردنی شەنگال لە سەرجەم ئەو هێزانەی كە لە ناوچەكەدا جێگیر كراون، بەڵام بەپێی زانیارییەكان تاكو ئێستا هێزەكانی حەشدی شەعبی و سوپای عێراق و پەكەكە لەوێ ماونەتەوە و ناشیانەوێت ڕێكەوتنەكەی نێوان هەرێم و بەغدا جێبەجێ بكرێت.

بەپێی زانیارییەكان، هەفتەی ڕابردوو شەڕ لەنێوان هێزەكانی سوپای عێراق و پەكەكە دروست بووە و ئاڵۆزییەكانی ناوچەكە بەردەوامە، هاوكات باڵیۆزانی توركیا و ئێران لەسەر بابەتی شەنگال لێدوانی دژبەیەكیان بڵاوكردووەتەوە، ئەمەش لەكاتێكدایە هیچ هێزێكی پێشمەرگە لە ناوچەكەدا بوونی نییەو وەك بەرپرسانی هەرێم ئاماژەی بۆ دەكەن ئەوان پابەندی ڕێكەوتنەكە دەبن.

سەعید مەموزینی بەرپرسی ڕاگەیاندنی پارتی دیموكراتی كوردستان لە موسڵ بە (خەڵك)ی ڕاگەیاند، دۆخی شەنگال باش نییە و باشیش نابێت تا ئەوكاتەی ڕێكەوتنی نێوان هەرێم و بەغدا جێبەجێ نەكرێت.
وتیشی”هەركات ڕێكەوتنەكە جێبەجێ كرا، دۆخی شەنگال سەقامگیر دەبێت”.

ڕوونیشیكردەوە، بێگومان دۆخەكە جێگیر نییە و ئاوارەكان نەگەڕاونەتەوە، ئارامی لە دۆخەكە نییەو حەشدی شەعبی و پەكەكە لە شەنگالن و سوپای عێراقیش هێزێكی ئەوتۆی نییە.

ئاشكراشیكرد، دۆخەكە باش نییە بەشێوەیەكی كاتی دۆخەكەیان ڕاگرت، بەڵام كێشەكان بەردەوامن و ڕێكەوتنەكە جێبەجێ نەكراوە و هۆكارەكەشی حەشدی شەعبی و پەكەكەن كە ڕێگرین لە جێبەجێكردنی.

وتیشی: دۆخەكە بەو شێوەیە نابێت بەردەوام بێت و بەدڵنیاییەوە دەبێت چارەسەرێكی بۆ بدۆزرێتەوە.

ئەمە لەكاتێكدایە ئاوارەكانی شەنگال تا ئێستا نەگەڕاونەتەوە سەر ماڵی خۆیان دوای داگیركردنی لە لایەن داعشەوە لە 2014 و دواتر گرتنەوەی جێگیربوونی گرووپە چەكدارەكانی سەر بەپەكەكە و دواتر هاتنی حەشدی شەعبی بۆ سنوورەكە.

شەنگال خاوەنی زۆری بۆ دروستبووە هەر لە پەكەكە، پارتی، بەغدا، لە ئەم دواییەشدا توركیا و ئێران، كە بەڕای چاودێران زۆرینەی ئەم لایەنانەی بە دوای بەرژەوەندی خۆیانەوەن، نەك گەلی ئێزدی و شەنگالییەكان.

بۆیە شەنگال لەنێوان رێكنەكەوتنی ئەم لایەنە دژ بەیەكانەدا ماوەتەوە بە وێرانی و بە چۆڵی و هیچ ئاسۆیەكیش بۆ چارەسەر دیار نییە.