سەردێر

ئەردۆغان پشتی لە ئیخوان كرد

ئیخوان بۆ بەرژەوەندییەكانی خۆی بەكاردەهێنێت

خەڵك-

گۆڕەپانی سیاسی توركیا جموجۆڵێكی فراوان بەخۆیەوە دەبینێت لە دوای داواكارییە یەك لە دوای یەكەكانی رەجەب تەیب ئەردۆغان سەرۆك و بەرپرسانی دیكەی دەوڵەتی توركیا بۆ نزیكبوونەوە لە دەوڵەتی میسر.

ژمارەی ئەندامانی گرووپی ئیخوان موسلیمین لە توركیا لە 5 بۆ 7 هەزار كەسە لە نێوان 35 هەزار میسری نیشتەجێی توركیا، كە نزیكەی 3 هەزار كەسیان رەگەزنامەیان وەرگرتووە و زۆرینەیان لە ئیستەنبوڵ نیشتەجێن و كەناڵی ئاسمانییان هەیە.

بەپێی زانیارییەكان راگرتنی پەخشی كەناڵە ئاسمانی و دامەزراوە میدیاییەكانی گرووپی ئیخوان مەرجی میسرە بۆ دەستپێكردنی گفتووگۆ، بەڵام تا ئێستا ئەنقەرە دڵنیایی داوە كە سەركردەكانی ئیخوان رادەست ناكات.

هیشام نەجار لێكۆڵەر لە كاروباری گرووپە توندڕۆكان دەڵێت مەترسی لەسەر گرووپی ئیخوان نییە لە كاتی دەسەڵاتی ئەردۆغان، چونكە كاری ئەو مانۆڕ و تاكتیكە بۆ گەیشتن بە ئامانج و بەرژەوەندییەكانی یان خۆلادانی لە قەیرانێك.

هیشام نەجار بۆ كەناڵی سكای نیوز دەڵێت پرۆژەی ئەردۆغان دەمێنێتەوە لەگەڵ ئامانجەكانی، ستراتیژێك لای ئەردۆغان هەیە، ئەویش رەوتی عوسمانی نوێیە، ئەویش بەكارهێنانی ئیخوان بۆ سەپاندنی هەژموونی خۆی بەپێی تاكتیكەكانی و گۆڕانكارییان لە كات و شوێنی خۆیدا، گۆڕانكارییەكانی ئێستاشی بۆ هەڵبژاردنی داهاتووە بەهۆی لاوازبوونی لە بەرامبەر ئۆپۆزسیۆندا.

رونیشیكردەوە ئەردۆغان هەوڵ دەدات كۆمەڵێك دۆسێ تێپەڕێنێت كە ئۆپۆزسیۆن لە دژی بەكاری دەهێنێت لەوانە دۆسێی میسر گەورەترین وڵاتی عەرەبی كە بووە بە زیانێكی گەورە بۆ توركیا بەهۆی پشتیوانی لە ئیخوان لەپاڵ هاوپەیمانی میسر لەگەڵ یۆنان و قوبرس لە دۆسێی دەریای نێوەڕاستدا.

توێژەری كاروباری توركیا سەڵاح لەبین دەڵێت جارێ زووە بۆ زانینی هەڵوێستی ئەنقەرە و لە هەموو بارێكدا حكومەتی دادو گەشەپێدان بەردەوامە لەسەر سیاسەتەكانی بۆ بەرژەوەندییەكانی ئایندەی.

دەشڵێت : ئامانجی ستراتیژی لە نزیكبوونەوە لە میسر و ئەنقەرە پەیوەستە بە ئیدارەدانی ململانێكانی رۆژهەڵاتی نێوەڕاست و دواتر لیبیا، دواتر چوونەوە ناوەوەی توركیا بۆ نێو میسر لە رێگای گرووپی ئیخوان موسلمینەوە.

لە دوای شۆڕشەكانی بەهاری عەرەبی و رووخانی رژێمەكەی حوسنی موبارەك، لە یەكەمین هەڵبژاردندا محەمەد مورسی كاندیدی ئیخوانەكان بووە سەرۆكی میسر لە 2012دا.

لە 30 حوزەیرانی 2013 عەبدولفەتاح سیسی سەرۆكی ئێستای میسر و وەزیری بەرگری لە كابینەكەی مورسی، كودێتایەكی ساز كرد و دەسەڵاتی گرتەدەست.

محەمەد مورسی دوای مانەوەی لە زینداندا كۆچی دوایی كرد و گرووپی ئیخوان قەدەغەكرا و خرایە لیستی تیرۆرەوە.

توركیا باوەشی بۆ گروپی ئیخوان كردەوە و ئەردۆغانیش پەیوەندییەكانی لەگەڵ میسردا رووی لە خراپی كرد بەهۆی پشتیوانییەكانی بۆ ئیخوان.

یەكێك لە خاڵە سەرەكییەكان كە ئۆپۆزسیۆنی توركیا دژی ئەردۆغان كاری لەسەر دەكات، بابەتی خراپی پەیوەندییەكانی هەردوو دەوڵەتە بەهۆی پشتیوانی لە ئیخوانەكان.

ئەردۆغان بەردەوام پشتیوانی لە گرووپە ئیسلامییە توندڕۆكانی ناوچەكە دەكات و بۆ بەرژەوەندی خۆی بەكاریان دەهێنێت لەوانە گرووپە چەكدارە توندڕۆكانی سوریا كە جگە لە شەڕی سوریا و گرتنی چەند ناوچەی رۆژئاوای كوردستان، بۆ شەڕی لیبیا و ئازەربایجانیش كەڵكی لێوەرگرتوون.

ئێستا ئەنقەرە سەرەڕای میسر، هەوڵی باشكردنەوەی پەیوەندییەكانی لەگەڵ عەرەبستانی سعودی و ئیماراتیش دەدات، دوای ئەوەی بەهۆی پشتیوانی ئیخوانەوە پەیوەندییەكانیان خرابپوو هاوشێوەی میسر.