سەردێر

ئاگادارییەك لە بەڕێوەبەرایەتی گشتی حەج و عومرە

خەڵك

بەڕێوەبەرایەتی گشتی حەج و عومرە ماوەی درێژكردنەوەی پێشكەش كردنی تەندەری بۆ كۆمپانیاكان تا 2021/04/12 درێژكردەوە.

بەڕێوەبەرایەتی گشتی حەج و عومرە ئاگاداری سەرجەم كۆمپانیاكانی حەج و عومرە دەكاتەوە،”ماوەی درێژكردنەوەی پێشكەش كردنی تەندەر تا 2021/04/12 درێژكرایەوە، بۆ ئەم مەبەستەش ئاسانكاری تەواو لە سەرجەم بوارەكان پێشكەش بەو كۆمپانیایانە دەكرێت كە لە ژێر ڕۆشنایی و ڕەزامەندی بەڕێوەبەرایەتییەكەیان دەیانەوێ خزمەت بە هاووڵاتیانی خۆشەویستی كوردستان بكەن”.

بڵاوكردنەوەی ئەم ئاگادارییەش لە كاتێكدایە، دەنگۆی ئەوە ھەیە كە هەندێك كۆمپانیا دەیانەوێت بەهەماهەنگی لەگەڵ كۆمپانیاكانی دەرەوەی دەسەڵاتی حكومەتی هەرێمی كوردستان، كار بكەن بۆ گواستنەوەی ئەو كەسانەی دەیانەوێ گەشتی عومرە ئەنجام بدەن.

بەڕێوەبەرایەتی گشتی حەج و عومرە ئەوەش دەخاتەڕوو،”لێرەوە بە پێویستی دەزانین هەموو ئەو كۆمپانیایانە ئاگاداربكەینەوە كە ڕێكارە یاساییەكان و هەماهەنگی بۆ ئەنجامدانی گەشتی عومرە تەنها لەڕێگەی وەزارەتی ئەوقاف و كاروباری ئایینی/ بەڕێوەبەرایەتی گشتی حەج و عومرە دەبێت، بە پێچەوانەوە هەر كۆمپانیایایەك پێچەوانەی ئەم بڕیارە بیەوێت گەشتی عومرە لەدەرەوەی ڕێكارەكانی بەڕێوەبەرایەتی گشتی حەج و عومرە لەگەڵ كۆمپانیاكانی دەرەوەی دەسەڵاتی حكومەتی هەرێم ئەنجام بدات ئەوا تووشی لێپێچینەوە و سزای یاسایی دەبێت”.

بەڕێوەبەرایەتی گشتی حەج و عومرە دەشڵێت:”دوای بڵاوكردنەوەی ئەم ئاگادارییە بەڕێوەبەرایەتییەكەمان مافی گرتنەبەری ڕێكاری یاسایی بۆ ئەم كۆمپانیایانە دەبێت كە لە دەرەوەی ڕێنمایی و یاساكان دەیانەوێت ئەم گەشتی عومرە ئەنجام بدەن”.