سەردێر

توێژینەوەیەكی نوێ‌: 5 كاریگەری كۆرۆنا بۆ ماوەیەكی درێژ دەمێننەوە

خەڵك-
توێژینەوەیەكی نوێ‌ چەند كاریگەرییەكی دوورمەودای ڤایرۆسی كۆرۆنا لەسەر مرۆڤ ئاشكرادەكات و بەپێی توێژینەوەكە، كاریگەرییەكان لە هەفتەی یەكەمەوە دەستپێدەكەن.

بەپێی توێژینەوەكە، كە ڕۆژی چوار شەممە لە گۆڤاری (Nature Medicine) بڵاوكراوەتەوە، ئاماژە بەوەكراوە، 5 كاریگەری ڤایرۆسی كۆرۆنا هەر لە هەفتەی یەكەمی تووشبوون بە ڤایرۆسەكە لە كەسەكەودا دەردەكەوێت، كە ئاماژەیەكن بۆ ئەوەی ئەو ڤایرۆسە بۆ ماوەیەكی زۆر لە جەستەدا دەمێنێتەوە.

ئەو پزیشك و توێژەرانە كاریگەرییەكانیان بە (هیلاكی، سەرئێشە، قورگ ئێشە، ئازاری جومگەكان، قورسی هەناسەدان) دەستنیشان كردووە.

توێژینەوەكە لە (كۆلێژی شاهانەی بەریتانی و نەخۆشخانەی ماساتشوستسی گشتی و نەخۆشخانەی بۆستن بۆ منداڵان) ئەنجام دراوە و پزیشكان و توێژەرەكان داوایان لە نەخۆشانی تووشبوو كردووە لە بەریتانیان و ئەمریكا و سوید تاوەكو كاریگەری و نیشانەكان لەڕێگەی بەرنامەیەكی تایبەتی مۆبایلەوە دیاری بكەن و تۆماری بكەن.

بەپێی گۆڤارەكە، توێژینەوەكە لەسەر 4 هەزار تووشبووی كۆرۆنا كراوە، كە دەركەوتووە، 13%ی تووشبووان كاریگەرییەكانی ڤایرۆسەكە بۆ ماوەی 28 ڕۆژ ماوەتەوە لە جەستەیاندا و 4%ی تووشبووان كاریگەرییەكان بۆ ماوەی 8 هەفتە بەردەوام بووە و 2% كاریگەرییەكان بۆ زیاتر لە 12 هەفتە بەردەوام بووە.

هەر لە توێژینەوەكەدا دەركەوتووە، هەتا تەمەنی كەسی تووشبوو زیاتربێت، ماوەی كاریگەری ڤایرۆسەكە لەسەر كەسەكە زیاتر دەبێت، بەجۆرێك بۆ تەمەنی 18 تا 49 ساڵ بەڕێژەی 9.9% و بۆ سەروو 70 ساڵ بەڕێژەی 21.9% دەبێت.