سەردێر

عیراق چووە قۆناغی بڵاوبوونەوەی كۆرۆنا

خەڵك-

وەزارەتی تەندروستی عیراق ڕایدەگەیەنێت، وڵات چووە قۆناغی بڵاوبوونەوەی پەتاى كۆرۆنا، ئەمەش هاوكاتە لەگەڵ تۆماركردنی زیاتر لە 5 هەزار تووشبوو لەماوەی 24 كاتژمێری ڕابردوو.

ئاژانسی دەنگوباسی فەرمی (العراقیە) لە زاری سەیف بەدر وتەبێژی وەزارەتی تەندروستی عیراقەوە بڵاویكردەوە”ڕەوشی پەتاكە هۆشداریی دەدات لە هاتنبەری مەترسییەكان لە سایەی پابەندنەبوون بە ڕێكارە تەندروستییەكان”.

بە وتەی بەدر”بەرەو چوونە نێو بڵاوبوونەوەی پەتاكە دەچین، یان دەكرێت بڵێین چوينە ئەو قۆناغە، بە تایبەت لە سایەی بڵاوبوونەوەی جۆرە گۆڕاوەكە كە بەشێوەیەكی خێراتر لەوەی پێشوو بڵاودەبێتەوە و منداڵان و لاوان تووش دەكات”، داواشی لە هاووڵاتیان كرد، كەمامە ببەستن بۆ بەرگرتن لە بڵاوبوونەوەی پەتاكە.

 

دوێنێ‌ پێنج شەممە، وەزارەتی تەندروستی عیراق ڕایگەیاند، لە ماوەی 24 كاتژمێری ڕابردوودا 5170 حاڵەتی نوێی تووشبوون بە ڤایرۆسی كۆرۆنا تۆماركراوە، 3057 كەسیش چاكبوونەتەوە، 26 كەسیش بەهۆی پەتاكەوە گیانیانلەدەستدا.