سەردێر

پەرلەمانتارێك: پێناچێت دوو شەممەی داهاتوو دەنگ لەسەر بودجە بدرێت

خەڵك-
ئەندامێكی پەرلەمانی عیراق، بەدووری دەزانێت، لە دوو شەممەی داهاتوودا دەنگ لەسەر بودجە بدرێت، هۆكاریی ئەمەش بۆ تەواونەبوونی یاسای دادگای فیدراڵی دەگێڕێتەوە.

شیروان میرزا، ئەندامی فراكسیۆنی یەكێتیی نیشتمانیی كوردستان لە پەرلەمانی عیراق، لە لێدوانێكیدا بۆ (خەڵك) ڕایگەیاند:”دەنگدان لەسەر پرۆژە یاسای بودجەی 2021، لەئێستادا بەندە بە یاسای دادگای فیدراڵی كە هەفتەی ڕابردوو 21 ماددەی تێپەڕێندرا و سێ‌ ماددەی ماوەتەوە”.

بە وتەی شیروان میرزا:”ئەو سێ‌ ماددەیەی ماون و ناكۆكییان لەسەرە، گەر لە دانیشتنی دوو شەممەی هەفتەی داهاتوو ڕێكەوتن لەسەر سێ‌ ماددەكە بكرێت و تێبپەڕێنرێت، ئەوا دەنگ لەسەر پرۆژە یاسای بودجەش دەدرێت، بەڵام گەر تێنەپەڕێنرێت، ئەوا دانیشتنی تایبەت بە پرۆژە یاسای بودجە ناكرێت”.