سەردێر

ژووری ئۆپەراسیۆنی هەولێر چەند بڕیارێكی دەركرد

هەر كەسێك ماسك نەبەستێت بڕی 20 هەزار دینار سزادەدرێت

 

خەڵك
ژووری ئۆپەراسیۆنی پارێزگای هەولێر بە مەبەستی ڕووبەڕووبوونەوەی كۆرۆنا ڕایگەیاند، یاد‌ و بۆنە نەتەوەیی و نیشتیمانییەكانی ئادار بەرز و پیرۆز ڕادەگیرین بەبێ ئەوەی هیچ گردبوونەوە و كۆبوونەوەیەكی جەماوەری ئەنجام بدرێت، و چەند بڕیارێكی دیكەش دران.

لە راگەیەندراوەكەی ژووری ئۆپەراسیۆنی پارێزگای هەولێردا هاتووە،” تیمی تەندرووستی لە بازگەكانی هەولێر لەگەڵ پارێزگاكانی موسڵ و كەركوك دەبن و هەر هاووڵاتییەك بێتە شاری هەولێر دەبێت پشكنینی كۆرنای كردبێت و 72 كاتژمێری بەسەردا تێپەڕ نەبووبێت”.

ئەوەش هاتووە، هەر هاوڵاتییەك ڕەچاووی بەستنی (دەمامك) و ڕێكارەكانی خۆپارێزی لە ڤایرۆسی كۆرۆنا نەكات، ڕووبەڕووی ڕێكاری یاسایی دەبێتەوەبە بڕی (20,000) هەزار دینار سزادەدرێت.

شەوی ڕابردوو پارێزگاری هەولێر و بەئامادەبوونی ئەندازیار عەلی ڕەشید، سەرۆكی ئەنجومەنی پارێزگای هەولێر، ژووری ئۆپەراسیۆنی پارێزگای هەولێر بۆ بەرەنگاربوونەوەی ڤایرۆسی كۆرۆنا لەدیوانی پارێزگا كۆبووە و چەند بڕیارێك دەركران…

یەكەم: پۆلی دوازدەی ئامادەیی و پەیمانگەكانی سەر بە وەزارەتی پەروەردە بەردەوام دەبن لە خوێندن، لە پۆلی یەكی بنەڕەتی تا 11ی ئامادەیی لەقوتابخانە حكومی و ناحكومییەكان لە 12/3 تاوەكو 24/3 پشوو وەردەگرن، بۆ ئەوانەی تاقیكردنەوەی 20 نمرەییان كردووه، ئەو پۆلانەشی تاقیكردنەوەی 20 نمرەیی دەكەن تەنیا بۆ تاقیكردنەوە دەچنە قوتابخانە، ئەوقوتابیانەی تاقیكردنەوەی 20 نمرەییان ئەنجام نەداوە، تاقیكردنەوەكان دەكەونە دوای چەژنی نەورۆز، سەبارەت بە زانكۆ و پەیمانگەكان رۆژمێری وەزارەتی خوێندنی باڵا هەیە و بە پێی رۆژمێری خۆیان پشوو دیاری دەكەن.

دووەم/ لە بازگەكانی هەولێر لەگەڵ پارێزگاكانی موسڵ و كەركوك، تیمی تەندرووستی لە بازگەكان دەبن، هەر هاووڵاتییەك بێتە شاری هەولێر دەبێت پشكنینی كۆرنای كردبێت و 72 كاتژمێری بەسەردا تێپەڕ نەبووبێت، هەركۆمپانیایەكی كۆمپانیا گەشتیاریی و گواستنەوە سەرپێچی لەو بڕیارەبكات ناوی دەچێتە لیستی ڕەش و بۆی نییە جارێكی تر هاوڵاتییان بۆ نێو شاری هەولێر بگوازێتەوە، ئەوانەشی ئیقامەیان هەیە و لە هەرێم نیشتەجێ نین، لە ناوچە كوردستانییەكان، ئەوان دەبێت هەفتەی جارێك تێستی كۆرۆنا بكەن و پێشكەشی لایەنی پەیوەندیداری بكەن.

سێیەم/ هەموو ئەو شوێنانەی كە كراوەن، (مۆڵ، ماركێت، شوێنە بازرگانییەكان‌)، دامەزراو و فەرمانگە حكومی و ئەهلیەكان و شوێنە گشتییەكان، پێویستە تەواوی مەرجە تەندروستییەكان و ڕێكارەكانی خۆپارێزی جێبەجێبكەن لەبەستنی (دەمامك) و دووری مەودای نێوان هاوڵاتییان و دروست نەكردنی قەرەباڵغی، بەپێچەوانەوە ‌هەرشوێنێك پابەند نەبێت ڕێكاری یاسایی لەبەرامبەردا دەگیرێتەبەر.

چوارەم/ یاد‌ و بۆنە نەتەوەیی و نیشتیمانییەكانی ئادار بەرز و پیرۆز ڕادەگیرین بەبێ ئەوەی هیچ گردبوونەوە و كۆبوونەوەیەكی جەماوەری بەم بۆنانەوە ئەنجام بدرێت و هەموو جۆرە كۆڕ و كۆبوونەوە و گردبوونەوە و كۆنفرانس و بۆنەیەكی ئاینی و كۆمەڵایەتی قەدەغەیە.

پێنجەم/ گەشت و سەیرانی هاوڵاتییان بەمەرجی جێبەجێكردنی ڕێنماییە تەندروستییەكان و ڕێكارەكانی خۆپارێزی و دروستنەكردنی قەرەباڵغی گربوونەوەی ژمارەی زۆری چەندین خێزان بەیەكەوە ڕێگە پێدراوە.

شەشەم/ كافتریا و یانە و چێشتخانەكان، دەبێت خزمەتگوزارییەكانیان لەدەرەوە و لەباخچەكان پێشكەش بە میوانانیان بكەن، ئەوانەشی كە باخچەیان نییە، پێویستە لە ژوورەوە ژمارەی میوانەكانیان سنووردار بكەن و پەنجەرە ودەرگاكان كراوە بن بۆئەوەی هەواگۆڕكێ هەبێت و ڕەچاووی دووری مەودای نێوان مێزەكان بكرێت.

حەوتەم/ ئەم شوێنانە لەكاتژمێر (12)ی شەو تاوەكو (6)ی بەیانی دادەخرێن:

(یانەكانی شەوانە، كافتریا، یانەكانی مەی خواردنەوە (باڕ).

هەشتەم/ پرسەدانان لە(كۆڵان-هۆڵ-ماڵ-ژێرخێوەت-باخچە) و مەراسیمی سەرقەبران بەهەموو شێوەیەك قەدەغەیە.

نۆیەم/ هۆڵەكانی سینەما لەگشت مۆڵ و بازاڕەكان بەتەواوی دادەخرێن.
دەیەم/ بووك گواستنەوە و ئاهەنگەكانی تری نیشان و لەدایك بوون لەهۆڵەكان لەقەرەباڵغی سنووردار دەكرێت بەمشێوەیەی لای خوارەوە:-

– هۆڵ ڕووبەری (500)م2، نابێت لە (60) كەس زیاتری تێیدا ئامادەبێت.

– هۆڵ ڕووبەری (1000)م2، نابێت لە (120) كەس زیاتری تێدا ئامادەبێت.

هەر خاوەن هۆڵ و سەرپەرشتیارێك سەرپێچی لەو بڕیارە بكات، هۆڵەكەی دادەخرێت.

یازدەیەم/ هاتووچۆ و چالاكی لە كەمپەكانی پارێزگای هەولێر سنووردار دەكرێن، تەنها ڕێگە بەو ڕێكخراو و لایەنانە دەدرێت كە هاوكاری و پێداویستی ڕۆژانە دابین دەكەن ئەویش بەنووسراوی پارێزگای هەولێر/ بەڕێوەبەرایەتی كۆچ و كۆچبەران و وەڵامدانەوەی قەیرانەكان، ڕێگەیان پێدەدرێت بەپابەندبوون بە ڕێنماییە تەندروستییەكان.

دوازدەیەم/ داوا لەمامۆستایان و پیاوانی ئاینی و یەكێتی زانایانی ئاینیی پیرۆزی ئیسلام دەكەین، هەروەك چۆن لە ڕابردوودا هاوكارمان بوونە، بەهەمانشێوە هاوكارمانبن بۆ هۆشیاركردنەوەی نوێژخوێنان كەپابەندی ڕێنماییە تەندروستییەكانبن و بەهیچ شێوەیەك ڕێگە بە نوێژخوێنان نەدەن بەبێ بەستنی (دەمامك) بڕۆنە ناو مزگەوت و شوێنە ئاینییەكان و بردنی منداڵان بۆ ناو مزگەوت قەدەغە بكەن.

سێزدەیەم/ داوا لەهاوڵاتییانی سنووری پارێزگای هەولێر دەكەین، لەپێناو سەلامەتی خۆیان و ئازیزانیان لەم قۆناغەدا بەوپەڕی هەستكردن بە بەرپرسیاریەتی پابەندی ڕێنماییە تەندروستییەكان و ڕێكارەكانی خۆپارێزی لە كۆرۆنا بن و (دەمامك)ببەستن، هەر هاوڵاتییەك ڕەچاووی بەستنی (دەمامك) و ڕێكارەكانی خۆپارێزی لە ڤایرۆسی كۆرۆنا نەكات، ڕووبەڕووی ڕێكاری یاسایی دەبێتەوە و بەپێی بڕگەی چواردەیەمی بەیانی ژمارە (52)ی ساڵی 2020ی وەزارەتی ناوخۆی حكومەتی هەرێمی كوردستان سزا دەدرێت، بەپێبژاردنی (20,000) هەزار دینار.

چواردەیەم/ هۆشداری دەدەینە سەرجەم شۆفێرانی (تایبەت، بارهەڵگر، كرێ) لەكاتی هەبوونی سەرنشین لەگەڵیاندا پابەندی ڕێناماییە تەندروستییەكانبن و خۆیان و سەرنشینەكانیان (دەمامك) ببەستن، هەر كەسێك سەرپێچی لەم بڕیارە بكات، لەلایەن پۆلیسی هاتووچۆ ڕێكاریی یاسایی لەبەرامبەریدا دەگیرێتەبەر.

پازدەیەم/ سەرجەم فەرمانبەرانی یەكە كارگێڕییەكانی سنووری پارێزگای هەولێر، دەبێت پابەندی تەواوی ڕێنماییەكان بن و ئەو بڕیارانە گشت قەزا و ناحییەكانی سنووری پارێزگای هەولێر دەگرێتەوە.
ئەم بڕیارانە لەكاتژمێر (12)ی شەوی (10) لەسەر(11)ی (3)ی 2021، دەچێتە بواری جێبەجێكردنەوە.