سەردێر

بزووتنەوەی ئیسلامی هۆشداری دەدات

خەڵك

ئەنجومەنی شورای بزووتنەوەی ئیسلامی كوردستان ڕایدەگەیەنێت، هەموو ڕێكارێكی یاسایی دژی ستەم و نادادی بەرامبەر بنەماڵەی شەهیدەكانمان دەگرینەبەر.

ئەنجومەنی شورای بزووتنەوەی ئیسلامی كوردستان لە ڕاگەیەنراوێكدا ڕایگەیاند، دوای بەرزبوونەوەی نرخی نەوت و زیادبوونی داهاتی هەرێمی كوردستان و نزیكبوونەوەی ڕێككەوتنی هەولێر و بەغدا لەسەر بودجە و كێشەی شایستە داراییەكانی هەرێمی كوردستان هیچ پاساوێك نەماوەتەوە بۆ كۆتایی نەهێنان بە لێبڕینی مووچەی فەرمانبەران و قەرەبوو كردنەوەیان لە مووچەی پاشەكەوتكراوی بە زۆرە ملێی فەرمانبەران و گشت مووچەخۆران.

دەقی ڕاگەیەنراوەكە:

٭هەموو ڕێكارێكی یاسایی دژی ستەم ونادادی بەرامبەر بنەماڵەی شەهیدەكانمان دەگرینەبەر

٭هیچ پاساوێك لەبەر دەم هەرێم نەماوە بۆ لێبڕین لە مووچەی فەرمانبەران

(ڕاگەیاندراوی كۆبوونەوەی ئەنجومەنی شورای بزووتنەوەی ئیسلامی)

بەناوی خوای گەورە و میهرەبان

ئەنجومەنی شورای بزووتنەوەی ئیسلامی كوردستان، لە ڕۆژی 10/3/2021 بەرامبەر 26/رەجەبی ساڵی 1442 كۆچی كۆبوونەوەی ئاسایی خۆی ئەنجامدا.
لە كۆبوونەوەكەدا ئەنجومەنی شورای بزووتنەوەی ئیسلامی بڕیاری پێویست و هەڵوەستەی كرد لەسەر ئەم تەوەرو بابەتە گرنگانەی خوارەوە
تایبەت بە دۆخی ئێستای هەرێمی كوردستان و ڕەوشی پرسە ئیداری و سیاسییەكانی نێوخۆیی بزووتنەوەی ئیسلامی:

1- بزووتنەوەی ئیسلامی وەك لایەنێكی سەرەكی ڕاپەرینە جەماوەریەكەی خەڵكی كوردستان لە دژی ڕژێمی گۆڕ بە گۆری بەعس بەدەیان شەهیدیشی داوە بەئامانجی رزگاری و ئازادی نەتەوەكەی لە بەهاری ساڵی 1991، بەڵام بەداخەوە دەسەڵات بەهۆی ناعەدالەتی و زوڵم وستەم و بێ باكی ئامانجەكانی ڕاپەرینیان ڵێڵ و وێرانكردووەو نەوەی نوێ و كۆمەڵگەی كوردستانیان نا ئومێدكردووە، هاوكات گیانی نەتەوەییان لە دڵ و دەروونی خەڵكی كوردستاندا كاڵكردوەتەوە، بزووتنەوەكەمان بێ بەشترین حزبە لە هەموو داهات و دەستەكەوتەكانی ئەو ڕاپەرینەو تا ئێستاش ئەو بینایانەی كە بەخوێنی شەهیدەكانمان گرتوومانە حزبەكانی دەسەڵات لێیان زەوتكردوین بێ ئەوەی خوێن و خەباتی شەهیدەكانمان لەبەر چاوبگیرێت، لەكاتێكدا زۆربەی هەرە زۆری بارەگاكانمان لە كرێچی دان.

2- ئەنجوومەنی شورای بزووتنەوە دەستخۆشی و پێزانینی هەیە بۆ گشت مەڵبەندو ئۆرگانەكان لەسەر كاروچالاكی و جوڵەی جەماوەری و پەروەردەیی و خۆراگریان سەرەرای هەبوونی ئاستەنگ و گرفتەكان، دڵنیایی دەدەینە ئەندامان و كادیرانی خۆمان كە ماندو نەناسیی و دڵسۆزی و لە خۆبوردوویمان دەبێتە مایەی گەشەی بەرچاو و گوڕوتینی خەباتی ئیسلامی بزووتنەوەكەمان لە داهاتوودا.

3- ئەنجوومەنی شورا پابەندی خۆی دووپات دەكاتەوە بەپڕەنسیپ و مەبادیئە ئیسلامیەكانی خۆی كە لەو پێناوە داو بەو ئامانجەش بزووتنەوە دامەزراوەو شانازی دەكەین بە دروشم و رابردوو و مێژووی پڕ سەروەری بزاڤی ئیسلامی كوردستان و خەباتی ئیسلامخوازانەی خۆمان.

4- دوای بەرزبوونەوەی نرخی نەوت و زیاد بوونی داهاتی هەرێمی كوردستان و نزیكبوونەوەی ڕێككەوتنی هەولێر و بەغدا لەسەر بودجە و كێشەی شایستە داراییەكانی هەرێمی كوردستان هیچ پاساوێك نەماوەتەوە بۆ كۆتایی نەهێنان بە لێبڕینی مووچەی فەرمانبەران و قەرەبوو كردنەوەیان لە مووچەی پاشەكەوتكراوی بە زۆرە ملێی فەرمانبەران و گشت مووچەخۆران.

5- ئەنجوومەنی شورای بزووتنەوە دڵگرانی و نیگەرانی خۆی دەردەبڕێت لەوەی كە خانەوادەی سەربەرزی شەهیدەكانی تا ئێستاش بێ بەشكراون لە پێدانی زەوی و هەموو ئەو مافە یاساییانەی كە مافی خۆیانە، بەڵام بەداخەوە جیاكاری و جیاوازی لە نێوان شەهیدەكانی حزبەكانی دەسەڵات و بزووتنەەی ئیسلامی ناهەقی و ستەمێكی گەورەیە لە خوێنی شەهیدانی باسك و خانەوادەكانیان، بزووتنەوەی ئیسلامی هەموو ڕێكارە یاسایی و مەدەنیەكان دەگرێتەبەر لە پێناو كۆتایی هێنان بەو ستەمە گەورەیە لە خانەوادەی سەربەرزی شەهیدەكانمان.

6- لە بەشێكی تری كۆبونەوەوەكەدا ئەنجوومەنی شورا بەتێرو تەسەلی و چڕوپڕی پرسی بەشداری و ئامادەكارییەكان و پێكهێنانی هاوپەیمانیەتی بۆ هەڵبژاردنی پەرلەكانی عێراق هەڵوەستەی لەسەر كراو ڕێوشوێنی گونجاو لەو بارەیەوە وەرگیراو داوا دەكات لە هەموو ئەندام و لایەنگرانی بزووتنەوەی ئیسلامی لە زووترین كاتدا بۆ مسۆگەركردنی مافی دەنگدان و ناوی خۆیان و خانەوادەكانیان تۆمار بكەن و كارتی بایۆمەتری وەربگرنەوە.

7-ئەنجوومەنی شورای بزووتنەوە داوا دەكات لە هەموو لایەنە سیاسیەكان هاوهەلوێستبن و ڕێزەكانیان یەكبخەن بۆ پاراستنی مافە نەتەوەییەكانی ناوچەكانی دەرەوەی ئیدارەی هەرێمی كوردستان، چونكە ئەگەر ڕیزەكانمان یەك نەخەین زیانێكی گەورە بەر گەلی كوردستان دەكەوێت.

ئەنجوومەنی شورای بزووتنەوەی ئیسلامی كوردستان/ هەولێر