سەردێر

نرخی بەنزین گران كرا

خەڵك-
جارێكی دیكە نرخی بەنزین لە بەنزینخانەكانی هەرێم و بەتایبەەتی سلێمانی گران كرایەوە و خاوەنی بەنزینخانەیەكیش دەڵێت: “بەهۆیی بەرزبوونەوەی نەوتی خاوەوەیە”.

سەرەڕای دابەزینی بەهای نەوتی خاو لە ساڵی ڕابردوودا بۆ نزیكەی 5 دۆلار بۆ یەك بەرمیل، بەڵام نرخی بەنزین لە شارەكانی هەرێم نزیكەی 10 بۆ 15 دینار بۆ یەك لیتر كەم كرایەوە، بەڵام لە ماوەی ئەم دوو مانگەی نرخی نەوتی خاو بەرزبۆتەوە بۆ نزیكەی 70 دۆلار بەتێكڕایی، بە سێ‌ قۆناغ نزیكەی 15 بۆ 20 دینار نرخی هەر لیترێك بەنزین گران كراوە.

خاوەنی بەنزینخانەیەك لە سلێمانی بۆ (خەڵك) ئاماژەی بەوەكرد، بەرزبوونەوەی نرخی بەنزین پەیوەندی بە بازاڕی جیهانی نەوتی خاوەوە هەیە و بەهۆی ئەوەی نرخەكەی بەرزبۆتەوە، نرخی بەنزینیش گران دەكرێت.

وتیشی، “ئەمڕۆ نرخی لیترێك بەنزینی نۆرماڵ بەرزكراوەتەوە بۆ 575 دینار و موحەسەن بۆ 625 دینار و سوپەر بۆ 725 دینار”.

بۆ بەدواداچوونی ئەو پرسە (خەڵك) پەیوەندی كرد بە د. هەڤاڵ ئەبوبەكر، پارێزگاری سلێمانی-یەوە، “كە لە ماوەی ڕابردوودا بە كۆبوونەوەی لەگەڵ خاوەنی بەنزینخانەكان چەند جارێك نرخی بەنزین هەرزان كرا”، بەڵام وەڵامی پەیوەندییەكەی نەدایەوە.

گران كردنی نرخی بەنزین لە هەرێم لەكاتێكدایە، كە نرخی سووتەمەنی بە گشتی لە عیراق جێگیرە و بەرزی و نزمی نرخی نەوتی خاو هیچ كاریگەری لەسەری نییە بەهۆی پاڵپشتی حكومەتی عیراق بۆ سووتەمەنی، بەڵام حكومەتی هەرێم ماوەی چەند ساڵێكە پاڵپشتی خۆی بۆ نرخی سووتەمەنی ڕاگرتووە.