سەردێر

دەمامك بەستن لە كاتی وەرزشدا پێویستە؟

خەڵك-

لەگەڵ بڵاوبوونەوەی كۆرۆنا لە جیهاندا شێوازەكانی ژیان گۆڕانكاری بەسەردا هات، بەتایبەت بەستنی دەمامك لە هەموو شوێنێك بووە كارێكی پێویست، پرسیاری زۆر دەكرێت لەسەر بەستنی دەمامك لە كاتی وەرزش و راهێنانەكاندا.

لەمبارەیەوە توێژینەوەیەكی ئیتالی ئاشكرایكردووە بەستنی دەمامك لە كاتی راهێنانی وەرزشیدا دەبێـتەهۆی سنوردانان بۆ بڵاوبونەوەی پەتای كۆرۆنا لەنێو یانەكاندا.

زاناكان لەنێوەندی مونزینو بۆ نەخۆشییەكانی دڵ لە شاری میلانۆ لە زانكۆی میلانۆ توێژینەوەیان لەسەر لێدانی دڵ و فشاری خوێن و ئاستی ئۆكسجین بۆ 6 پیاو و ژن كردووە لە كاتی وەرزشدا بە دەمامك و بێ دەمامك.

توێژەران ئەنجامیان دەستكەوتووە كە ئاستی پێوانەكان لە كاتی بوونی دەمامك و نەبوونی دەمامكدا وەك یەك نەبووە، بەڵام لەگەڵ ئەوەشدا هیچ ئاماژەیەك نەدۆزراوەتەوە كە بوونی دەمامك لە كاتی وەرزشدا مەترسی هەبێت لەسەر تەندروستی.

لەگەڵ ئەوەشدا بوونی دەمامك دەبێتەهۆی كەمكردنەوەی توانای وەزرشوان بە رێژەی 10% بەهۆی تەنگەنەفەسییەكی كەم.

ماسیمو مابیلی پزیشكی دڵ دەڵێت: هیچ مەترسییەك لەسەر ئەو كەسانە نییە كە بە دەمامكەوە وەرزش دەكەن تەنانەت كە بە ئەوپەڕی هێزیشەوە بیكەن.

لای خۆیەوە سام بیات زانای فسیۆلۆجی لە نەخۆشخانەی زانكۆی گرونوبڵ كە بەشداری توێژینەوەكەی نەكردووە، دەڵێت: سەرەڕای ئەنجامەكانی ئەم توێژینەوەیە، بەڵام پێویستی بە توێژینەوەی زیاتر هەیە لە سەر خەڵكی زیاتر، رەنگە بەستنی دەمامك لە كاتی وەرزشدا كاریگەری هەبێت.

دەشڵێت: توێژینەوەكان ئاماژە بەوە دەكەن كە بەستنی دەمامك رێگری لە كۆرۆنا دەكات، بەڵام بەڵگەی روون نییە لەسەر ئەوەی بەستنی دەمامك لە كاتی وەرزشدا بێ زیان بێت.