سەردێر

ڕۆژی جلوبەرگی كوردییە

خەڵك-

ئەمڕۆ چوار شەممە 10-3-2021 ڕۆژی پۆشینی جلوبەرگی كوردییە لە هەرێمی كوردستان.

پەڕلەمانی كوردستان ڕۆژی 10ی ئاداری هەموو ساڵێكی وەك ڕۆژی پۆشینی جلوبەرگی كوردی لە هەرێم و بەتایبەت لە ناوەندەكانی خوێندن و فەرمانگەكانی حكومەتی هەرێم دیاری كردووە و دانیشتوانی هەرێم هەموو ساڵێك بە پەرۆشەوە یادی ئەو ڕۆژە دەكەنەوە و بە جلوبەرگی ئاڵاو واڵای كوردی نیشتمان دەڕازێننەوە.

(خەڵك) چووە نێو بازاڕی سلێمانی و بەنێو دووكانەكانی جلی كوردی پیاوانەدا گەڕا، هەر دووكانێكت دەبینی جمەی دەهات لەكڕیاری جلی كوردی، چەند بەرگدرووێكیشمان دواند، دەیانوت: چیتر قوماش وەرناگرین.

پیاوێك بەناوی ئازاد ئەحمەد كە خەریكی كڕینی قوماشی جلی كوردی بوو پێی وتین: ساڵێكە بەهۆی كۆرۆناوە هەر لەكەرەنتینە و نیگەرانیدا بووین، ئێستاش سوپاس بۆ خوا دۆخەكە بەرەوئاسایی بوونەوە چووە، بۆیە پێمانخۆشە لەئێستاوە پێشوازی لەبەهار بكەین و جلی كوردی بۆ بكڕین و بچینەدەرەوە بۆ گەشت و سەیران.

شێخ ڕەئوف شێخ سەعید بازرگانی قوماش ڕایگەیاند، ئەمساڵ فرۆشی قوماشی جلی كوردی بەراورد بەساڵی ڕابردوو باشترە و چاوەڕێدەكرێت باشتریش بێت، بەڵام بەداخەوە ساڵی ڕابردوو ساڵێكی پڕ نەخۆشی و پڕ ناخۆشی بوو، بەتایبەت بۆ كەسانی كاسب زۆر خراپبوو و فرۆشیان نەبوو.

بەپێی زانیارییەكان، نرخی دوورینی قوماش بۆ جلی كوردی بەپێی شێوازی دوورینەكە دەگۆڕێت، بەجۆرێك نرخەكان لە٢٥ هەزار دینارەوە تاكو ٨٠ هەزار دینار و زیاتر دەڕوات.